Medıa-2020: Jalǵan aqparattarmen kúresti bastaýysh synypta úıretý kerek
ASTANA. QazAqparat - Zamanaýı tehnologııalar men jekeshelendirýler álemdik buqaralyq aqparat quraldarynyń bedelin azaıtty. Bul pikirdi frantsııalyq sarapshy, jýrnalıst Djon Magýaır Astanada ótip jatqan "Medıa-2020" konferentsııasynda málim etti, dep habarlaıdy QazAqparat tilshisi.
"44 jyl buryn jýrnalıstıkaǵa alǵash kelgenimde ómirimiz múldem basqasha boldy. Uıaly telefondar bolǵan joq, ınternet pen áleýmettik jeliler de joq. Ol kezde Qazaqstan degen eldiń bar ekenin bilmedim. Tek Keńes odaǵy men AQSh qarym-qatynasynyń jaısyz ekenin biletinbiz. Qazirgi álemde bolyp jatqan oqıǵalar da sol kezeńdi eske túsiredi. Bir ǵana aıyrmashylyq - 44 jyl buryn jýrnalısterdiń bedeli bar edi. Baspasózdi halyq qurmetteıtin. Al qazir álemde BAQ-qa degen senimniń azaıǵanyn baıqap otyrmyz. AQSh-ta dástúrli habar taratý jaǵy osal, onda barlyǵy jekeshelendirilgen jáne aqshaǵa kelip tireledi. Kıberkeńistiktiń ár buryshynda otyrǵan adamdar bir-biriniń pikirin tyńdamaıdy, birin-biri uǵynǵysy kelmeıdi. Adamdar planshet, telefon, kompıýter arqyly kez kelgen jerden-aq qalaǵan aqparatyn ala alady. Medıanyń róli azaıyp barady", - dedi ol.
Sheteldik sarapshy bul máseleniń sheshimi - arnaıy yntymaqtastyq qurý dep esepteıdi. ıAǵnı, qoraptan shyǵyp, ózgelerge qulaq túrý qajet.
Sondaı-aq, sarapshynyń pikirinshe, jalǵan aqparattarǵa qarsy turý úshin, balalarǵa erte jastan medıa týraly bilim bergen jón.
"Jalǵan habarlarmen kúresý úshin frantsýz televızııalyq stantsııalarynda "Ras pa ótirik pe?" dep atalatyn baǵdarlama kórsettik. Bul 15 mınýttyq baǵdarlama kún saıyn beriledi jáne aqparattyń ras-ótirigin qalaı anyqtaý qajettigin úıretedi. Onda naqty mysaldar keltirý arqyly eresekter men balalarǵa túsinikti tilde aqpar beriledi. Bul turǵyda frantsýz bıligi bastaýysh synyptan bastap, balalarmen jumys isteı bastaıdy. Sebebi balalarǵa kúndelikti tolassyz aqparattar kelip túsedi, olarǵa medıa týraly bilimdi berý óte mańyzdy. Biz jýrnalısterdi mektepterge jiberemiz jáne balalardy óz bólimderimizge shaqyryp, qalaı jumys isteıtinimizdi kórsetemiz. Osylaısha, olar túrli aqparat kózderinen senimdi aqparat alýdy úırenedi", - dedi Djon Magýaır.
