Medıa-2020: Ortalyq Azııa BAQ-tarynyń odaǵyn qurý usynyldy
«Batys pen Shyǵys tanymy arasynda aıyrmashylyq kóp, ekeýi eki álem. Búgingi tańda óz elderimizde jáne halyqaralyq jıyndarda osy máseleni talqylaýymyz qajet dep esepteımin. Bir qytaılyq ókildiń aıtqan sózi bar. «Batys medıasy Qytaı jańalyqtaryn jetkilikti dárejede kórsetpeıdi, kerisinshe álsiz tustaryn áshkerelegisi kelip turady» deıdi ol. Táýelsiz zertteýler nátıjesi de álemdegi bedeldi BAQ-tardyń únemi obektıvti bola bermeıtinin kórsetti. Bir jaǵynan Batys elderi Qytaıdyń, ıslam elderiniń jýrnalıstıkasyn sýbektıvti dep aıyptaıdy. Osynyń barlyǵy ortaq alańda talqylanýy kerek jáne ońdy kontentke qol jetkizý úshin durys medıalandshaft qurýymyz qajet», - dep atap ótti All India radıosynyń bas dırektory Faııaz Shehrııar.
Óz kezeginde forým moderatory, Qazmedıa ortalyǵy tóraǵasynyń orynbasary Erlik Qarajan ortalyqazııalyq BAQ odaǵyn qurý bastamasyn kóterdi. Bul usynysty «Habar» agenttiginiń tóraǵasy Alan Ájibaev qoldady.
«Medıatoptar ózara seriktestik ornatyp, aqparatpen jáne kontentpen almasqanda, aqparattyń durystyǵyna degen senim de arta túsedi. Óńirler úshin kórermenge shynaıy aqparatty jetkizý mańyzdy», - dedi Alan Ájibaev.
Forýmnyń ashylý saltanatynda QR Aqparat jáne kommýnıkatsııalar vıtse-mınıstri Nurgúl Maýberlınova damýshy elderdiń aqparattyq aǵynyndaǵy Ortalyq Azııa rólin qaıta qaraý qajettigi jóninde aıtty.
Aıta keteıik, Astanada uıymdastyrylǵan «Azııa medıa dıalogyna» álemniń 40 elinen 150-den astam delegat keldi. Forým baǵdarlamasy úsh iri sharadan quralǵan: «Azııa elderindegi radıo», «Azııa án festıvali» jáne «Medıa 2020» forýmy. Forým sessııalarynyń biri feık-jańalyqtarǵa arnalady.
