Medeýden Shymbulaqqa baratyn jolda 20 tekshe metr tas qulady

ALMATY. QazAqparat – Medeýden Shymbulaqqa baratyn jolda 20 tekshe metr tas qulaǵan. Qazir jol jabyq, dep habarlaıdy QazAqparat Tótenshe jaǵdaılar mınıstrliginiń baspasóz qyzmetine silteme jasap.

Oqıǵa 12 sáýirge qaraǵan túni bolǵan. «Qazseldenqorǵaý» MM Almaty óndiristik qalalyq paıdalaný basqarmasy fılıalynyń mamany «Mohnatka» taýy mańynda, Medeý bógetiniń tusynan 300 m joǵary (Shymbulaqqa barar jolda) jerde kólemi shamamen 20 m3 tas opyrylyp túskenin anyqtaǵan.

Jaýyn-shashyn men kóshkin qaýpine baılanysty aldyn ala qoıylǵan blokbeketterdiń arqasynda adamdardyń zardap shegýine jol berilmedi.

Tastardyń kóp bóligi qorǵanys qabyrǵasynyń ishinde qulaǵan, alaıda qorǵanys qabyrǵasy, sondaı-aq qorǵanys torlary zaqymdanǵan, 2 tireý maıysqan.

Taýdan tastardyń qaıta qulaý qaýpine baılanysty «Qazseldenqorǵaý» MM mamandary «Medeý» tabıǵı parki KMM avtojol ýchaskesin tolyq jabý týraly usynymdar berdi. Qazirgi ýaqytta jol (Medeý-Shymbulaq) jabyldy. Qalanyń arnaýly qyzmetteri jumys istep jatyr.

Almaty qalalyq TJD men «Qazseldenqorǵaý» almatylyqtardy, týrıster men megapolıs qonaqtaryn «Qazgıdromettiń» jaýyn-shashyn týraly boljamyna baılanysty taýǵa barýdan bas tartýǵa shaqyrady. Sonymen qatar, taýda qalǵan týrısterge barlyq qaýipsizdik sharalaryn saqtaýǵa keńes beredi.

Eger sizge kómek qajet bolsa, 112, 109 nemese 8 (727) 372 -15-60 (QR TJM RJQJ MM kezekshi-dıspetcherlik bólimshesi) jelilerine qońyraý shalý qajet.

Eske salsaq, Aıýsaı shatqalynda tastar qulap, sarqyramalarǵa aparatyn joldy basyp qalǵan bolatyn.