Medeýdegi órt kezinde qaza tapqan Qurmanbekovtiń otbasyna 13 mln teńge ótemaqy beriledi

ALMATY. QazAqparat - Almaty qalalyq tótenshe jaǵdaılar departamenti qaza tapqan qyzmetker Arslan Qurmanbekovtiń muragerlerine onyń alpys aılyq aqshalaı qarajaty (5 jylǵy) - shamamen 13 mln teńge mólsherinde birjolǵy ótemaqy tólenetinin málimdedi, dep habarlaıdy QazAqparat.

Sonymen qatar, jerleýge jumsalǵan shyǵyndaryna 600 myń teńge kóleminde ótemaqy tólenetin bolady.

«Jerleý boıynsha barlyq shyǵyndardy Almaty qalasynyń Tótenshe jaǵdaılar departamenti uıymdastyrdy. TJ mınıstrligi Prezıdent Ákimshiligine memlekettik nagradaǵa qyzmettik boryshyn oryndaý kezinde qaza tapqan órt sóndirýshi A.J. Qurmanbekovti marapattaý týraly usynys engizdi.

Sonymen qatar, Almaty qalasy ákimdiginiń atyna áleýmettik kómek tártibinde A.Qurmanbekovtiń anasyna turǵyn úı bólý múmkindigin qarastyrý týraly ótinish joldandy», - dep jazdy vedomstvodan.

TJD taratqan habarlamaǵa qaraǵanda, ózge de qosymsha kómek kórsetý máseleleri pysyqtalýda.

Aıta keteıik, Almaty qalasynda Medeýde tutanǵan otpen kúres kezinde órt sóndirýshi Arslan Qurmanbekov mert bolǵanyn jazǵan bolatynbyz.