Medeýdegi alapat órttiń shyǵýyna adam faktory sebep bolýy múmkin
ALMATY. QazAqparat - Medeýdegi iri órttiń shyǵý sebebi tekserilip jatyr. Bul týraly baspasóz máslıhaty barysynda Almaty qalalyq TJD basshysynyń mindetin ýaqytsha atqarýshy Samat Asaınov aıtty,dep habarlaıdy QazAqparat tilshisi.
Aıtýynsha, oqıǵa ornynda departament anyqtaýshylary jumys istegen.
Kýágerlerdiń sózinshe, olar taýdan tómen qaraı júgirip kele jatqan adamdardy kórgen, sodan keıin shyrshalar órtene bastaǵan.
Kúdiktilerdi anyqtaýǵa arnalǵan barlyq materıaldar Medeý aýdanynyń polıtsııasyna tapsyryldy.
Sotqa deıingi tergeý aıasynda oqıǵanyń mán-jaıy men sebepteri anyqtalady.
Zerthananyń aldyn ala qorytyndysy boıynsha, órttiń shyǵý sebebi - ashyq ot oshaǵy.
«Gorelnık taýynyń bul bóligi týrısterge qatty unaıdy, ol jerge kelýshiler óte kóp. Órttiń shyǵýyna adam faktory sebep bolýy múmkin. Bizdiń anyqtaýshylar sol jerge baryp, kelýshiler ortalyǵyndaǵy dámhanada bolǵan respondentterdiń aıtýynsha, eńis jaqtan bireýdiń júgirip kele jatqan, sodan keıin shyrshalar otqa oranǵan. Osy derekterdi negizge ala otyryp, materıaldar polıtsııaǵa joldandy», - dedi Samat.Asaınov.
Eske salaıyq, 7 mamyr túngi saǵat 23.00 shamasynda Іle Alataýy memlekettik ulttyq tabıǵı parki Kishi Almaty ormanshylyǵy 33-aýmaǵynda órt shyqqan bolatyn.
Jalynmen kúreske órt sóndirýshiler, birneshe tehnıka men tikushaq jumyldyrylǵan.
Tutanǵan otpen kúres kezinde órt sóndirýshi Arslan Qurmanbekov mert boldy.
Keıin Almaty qalalyq tótenshe jaǵdaılar departamenti qaza tapqan qyzmetker Arslan Qurmanbekovtiń otbasyna 13 mln teńge ótemaqy beriletinin aıtty.
