Medeýde tórt ret Everest shyńyn baǵyndyrǵan alpınıst Anatolıı Býkreevtiń músini ornatyldy
ALMATY. QazAqparat- Búgin Almatyda Medeý shatqalynda kórnekti qazaqstandyq alpınıst Anatolıı Býkreevke arnalǵan músin saltanatty túrde ashyldy, dep habarlaıdy QazAqparat tilshisi.
Músinniń avtory – Nurlan Dalbaı. Ol Anatolıı Býkreevti quzǵa shyǵar aldynda sál demalyp turǵan keıpinde beınelegen. Alpınıstiń qoly muz shapqyshqa tıip tur. Músin Nurlan Smaǵulov qorynyń bastamasymen jáne qoldaýymen ornatyldy.
«Aty ańyzǵa aınalǵan jerlesimiz, alpınıst Anatolıı Býkreevke arnalǵan músin kompozıtsııany ornatý týraly bastamamen belgili metsenat, kásipker Nurlan Smaǵulov ákimdikke ótinish bildirgende, biz bul ıdeıany zor yntamen qoldadyq. Anatolıı Býkreev shyn máninde aty ańyzǵa aınalǵan adam. Ol elimizdiń, qalamyzdyń, taýymyzdyń, sportymyzdyń dańqyn asqaqtatty», - dedi Almaty qalasy ákiminiń orynbasary Arman Qyryqbaev.
Saltanatty sharaǵa arnaıy kelgen alpınızmnen Qazaqstan quramasynyń bas jattyqtyrýshysy, tálimger jáne Býkreevtiń dosy Ervand Ilınskıı, jýrnalıst jáne aty ańyzǵa aınalǵan alpınıstiń kúndelikterine negizdelgen Býkreev týraly «Nad oblakamı» kitabynyń avtory Galına Mýlenkovalar sportshy týraly estelikter aıtty.
«Ol Almatyǵa úshinshi razrıadpen kelip, bizdiń qazaqstandyq quramaǵa alpınızmmen aınalysý úshin arnaıy kelgenin aıtty. Ol komandaǵa qosylý úshin tıisti standarttarǵa saı bolýy kerek edi. Qazaqstan quramasynyń quramynda ol birneshe kúrdeli shyńdy baǵyndyrdy, sport sheberi boldy, sodan keıin KSRO quramasyna qabyldandy. Kanchendjangaǵa ekinshi keńestik Gımalaı ekspedıtsııasynyń múshesi boldy. Osydan keıin ol segiz myńdyq bıikke kóterilip, bizdiń komandada Keńes Odaǵynyń chempıony atandy. Keıin ony sheteldikter shaqyra bastady. Ol qutqarý jumystaryna da qatysty. Máselen, Everestte 2-3 adamdy qutqaryp qaldy», – dedi Ervand Ilınskıı.
2023 jyldyń 16 qańtarynda Býkreev 65 jasqa tolar edi. Anatolıı Nıkolaevıch – bıik taýdaǵy alpınıst, eńbek sińirgen sport sheberi, «Qar barysy» ataǵynyń ıegeri, segiz myńdyq planetanyń 14 taýynyń 11-in jáne tórt ret Everestti baǵyndyrǵan. Onyń Everestke kóterilýiniń biri Baltazar Kormakýrdyń «Everest» gollıvýdtyq fılminiń negizi boldy. Anatolıı Býkreev – «Erligi úshin» ordeniniń ıegeri (1989), óz ómirine qaýip tóne tursa da, taýda adamdardy qutqarǵan alpınısterge beriletin amerıkalyq alpınızm klýbynyń eń joǵary nagradasy — Devıd Soýls medaliniń ıegeri (1997), qaıtys bolǵannan keıin qazaqstandyq «Erligi úshin» medalimen marapattaldy (1998).
