Medeýde ózenge laı aǵyp jatyr — «Almaty sý» jaýap berdi

ALMATY. KAZINFORM — Almatyda Medeý muz aıdynynyń janyndaǵy ózenge laı sý quıylǵan.

Bul kórinistiń beınejazbasy áleýmettik jelide tarady.

Oqıǵa boıynsha «Almaty Sý» mekemesi túsinikteme berdi. Resmı jaýapqa sáıkes, sýdyń laılanýyna aýa temperatýrasynyń kóterilýi, taýly aımaqtarda (sonyń ishinde muzdyqtarda) qar jamylǵysynyń mol erýi, sondaı-aq sel aǵyndarynyń túsýi áser etedi.

— Mundaı kezde sý daıyndaý stantsııalarynda alynatyn sýdyń kólemi tehnologııalyq jáne sanıtarlyq shekteýlerge baılanysty májbúrli túrde qysqartylady. Stantsııalarda taý ózenderinen alynǵan, laılylyǵy joǵary jáne aýyzsý sapasyna deıin tazartý múmkin emes sýdyń bir bóligi aǵyzylyp otyrady, — dep habarlady mekemeden.

Alaıda «Almaty sý» mamandarynyń aıtýynsha, aǵyzylǵan sý quramynda bógde qospalar joq jáne qorshaǵan ortaǵa qaýip tóndirmeıdi. Qaq qalada sý berý qalypty rejimde júzege asyrylyp jatyr.

Eske salaıyq, buǵan deıin «Medeý» muz aıdyny osy syrǵanaý maýsymynan keıin birneshe jylǵa jabylǵanyn jazǵanbyz.