«Medeýde» kólik qaqqan velosıpedshi jansaqtaý bóliminde jatyr

ALMATY. KAZINFORM – Almatyda Medeý muz aıdynyna baratyn jolda velosıpedshini kólik qaǵyp ketti. Jaraqat alǵan azamat aýyr halde aýrýhanaǵa jetkizilgen.

Jelidegi málimetke sáıkes, zardap shekken azamat — tájirıbeli sportshy, trıatlonmen aınalysatyn kásibı atlet. Jol-kólik oqıǵasynyń saldarynan onyń birneshe qabyrǵasy synyp, aýyr jaraqat alǵan. 

Almaty qalasy polıtsııa departamentiniń málimetinshe, jol apaty 6 tamyz kúni tańǵy saǵat 08:20 shamasynda Medeý aýdanynda bolǵan.

— Toyota Camry markaly avtokóliktiń júrgizýshisi Kereı men Jánibek handar kóshesimen ońtústik baǵytta kele jatyp, solǵa burylǵan kezde velosıpedshini qaǵyp ketken. Jol apaty saldarynan azamat dene jaraqatyn alyp, aýrýhanaǵa jetkizildi. Medeý aýdandyq polıtsııa basqarmasynyń qyzmetkerleri oqıǵanyń mán-jaıyn anyqtap jatyr, — dep habarlady polıtsııadan.

Almaty qalasynyń qoǵamdyq densaýlyq saqtaý basqarmasy naýqastyń Ortalyq qalalyq klınıkalyq aýrýhanaǵa aýyr jaraqatpen túskenin málimdedi.

— Naýqasqa shuǵyl ota jasaldy. Qazirgi ýaqytta ol jansaqtaý bóliminde jatyr. Jaǵdaıy aýyr dep baǵalandy, — delingen basqarma jaýabynda.

Eske salaıyq, buǵan deıin «Medeý» aýmaǵynda áýege kóterilgen tikushaq adamdarǵa qaýip tóndirgenin jazǵanbyz.