«Medeýde» «Aıt Fest» ótedi degen aqparat jalǵan - Almaty sport ǵımarattary dırektsııasy

ALMATY. QazAqparat - Áleýmettik jelilerde jarııalanǵan 28 maýsym kúni «Medeý» bıik taýly sport kesheninde «Aıt Fest» festıvali ótedi degen aqparat shyndyqqa sáıkes kelmeıdi. Bul týraly «Almaty qalasynyń sport ǵımarattary dırektsııasy» JShS málim etti, dep habarlaıdy QazAqparat tilshisi.

Dırektsııanyń málimetinshe, «Aıt Fest» festıvalin uıymdastyrýshy men Dırektsııa arasynda festıvaldi ótkizý týraly kelissózder júrgizilmegen jáne tıisti kelisim jasalmaǵan.

«Budan bólek, 27-29 maýsym kúnderi «Medeý» bıik taýly sport kesheninde sport festıvalin ótkizý josparlanýda. Sondaı-aq,»Azııa daýysy«halyqaralyq mýzyka festıvalin Medeýde ótkizý josparlanǵandyqtan 29 maýsymnan bastap montajdaý jumystary men dekoratsııalardy resimdeý júrgiziledi, demek munda ózge is-sharalardy ótkizý múmkin emes», - delinedi «Almaty qalasynyń sport ǵımarattary dırektsııasy» JShS habarlamasynda.

Dırektsııa shyndyqqa janaspaıtyn mundaı jalǵan aqparattar jalǵasar bolsa, onda quqyqtary men zańdy múddelerin qorǵaý úshin quqyq qorǵaý organdaryna júginetinin eskertti.