«Medeý» tabıǵı saıabaǵynyń ınfraqurylymy bıýdjetten tys qarajat arqyly jańartylady
ALMATY. QazAqparat - «Medeý» tabıǵı saıabaǵynyń ınfraqurylymy bıýdjetten tys qarajat arqyly jańartylady. Bul týraly Almaty qalasy ákiminiń baspasóz qyzmetinen habarlady.
«Medeý» tabıǵı saıabaǵynyń ınfraqurylymyn damytý jáne jaqsartý jóninde taıaýda qabyldanǵan keshendi josparǵa sáıkes, onyń 36 tarmaǵynyń toǵyzyna qarjylandyrý qajet emes. Al tórt tarmaǵy ınvestorlar arqyly júzege asyrylady», - delingen habarlamada.
Sonymen, jospar boıynsha saıabaq aýmaǵyndaǵy músinder, tarıhı nysandar qaıta qalpyna keltiriledi jáne qosymsha týrıstik baǵdarlar engiziledi.
Sonymen qatar, ekologııalyq ortaǵa zııandy áserin azaıtý úshin, saıabaq aýmaǵyna avtokólikterdiń kirýine shekteý qoıylady.
Al «Medeý» sport kesheni men «Shymbulaq» taý shańǵysy bazasy arasynda arnaıy baǵdar ashylady. Munda eki bazanyń arasyna tabıǵı otynmen júretin «ShuttleBus» avtokóligi qatynaıtyn bolady.
Sondaı-aq, saıabaqta ekologııalyq qaýipsizdikti qamtamasyz etý maqsatynda kóshet otyrǵyzý jumystary jandandyrylady jáne olar kenege qarsy hımııalyq jáne bıologııalyq óńdeýden ótkizilip turady.
Almaty qalasynyń ákimdigi «Medeý» tabıǵı saıabaǵynyń ınfraqurylymyn damytý jáne jaqsartý jumystaryn ınvestorlardyń, qoǵamdyq uıymdardyń jáne qala turǵyndarynyń kómegine súıenip, júzege asyrýǵa nıetti.
Bul úshin arnaıy Úılestirý keńesi qurylady, sondaı-aq, saıabaq aýmaǵynda senbilikter, ashyq baıqaýlar, mádenı-kópshilik jáne qyzyqty sport sharalary ótkiziletin bolady.
