«Medeý» tabıǵı saıabaǵynda 5 jańa týrıstik súrleý jol paıda boldy (FOTO)
ALMATY. QazAqparat - Almaty irgesindegi «Medeý» tabıǵı saıabaǵynda «Saıabaqtar sherýi» atty halyqaralyq tabıǵatty qorǵaý aktsııasy ótkizildi. Oǵan myńnan astam belsendi azamattar qatysty.
Almaty qalasy tabıǵı resýrstar jáne tabıǵatty paıdalanýdy retteý basqarmasynyń habarlaýynsha, shara aıasynda bes jańa týrıstik soqpaq jol ashyldy. Olar: «Medeý» bıik taýly sport kesheni - Gorelnık shatqaly, «Medeý» - Myńjylqy shatqaly, «Medeý» - Býtakovka shatqaly, «Medeý» - Kimasar shatqaly jáne «Medeý» - Kókjaılaý shatqaly. Bes topqa bólingen belsendiler «KazakhAlpineClub» klýbynyń ınstrýktorlarynyń kómegimen árbir jańa súrleýdi júrip ótti.
Sonymen qatar, «Almaty» jáne «Almatybroteam» klýbynyń 100 velosıpedshisi «Beladjıo» meıramhanasynan «Medeý» bıik taýly sport keshenine deıin - 7 shaqyrymdyq velosherýge qatysty. Velosıpedshiler Nııaz Januzaqov, Ǵalymjan Jáńgirov jáne Dmıtrıı Kım birinshi bolyp keldi.
Sondaı-aq, jartasqa órmeleýden Almaty mektepteriniń oqýshylary arasynda «Medeý» saıabaǵynyń chempıonaty jáne «Mountain Racing» velojarysy ótkizildi. Budan basqa, senbilik uıymdastyryldy. Saıabaq aýmaǵy qoqystar men qýraılardan tazartylyp, qylqan japyraqty 30 aǵash kósheti otyrǵyzyldy jáne aǵashtarǵa qustar úshin 40 úıshik ornatyldy.
«Saıabaqtar sherýine» Qurmanǵazy atyndaǵy Qazaq ulttyq konservatorııasynyń Úrmeli orkestriniń mýzykanttary, shoý-bıznes juldyzdary - Talǵat Jorabaev, Mezzo kvarteti, rep oryndaýshy Saılaýbek, Asqar Kómekbaev, Aıbo, Samat Ryskeldıev, Tımýr Dastanov, «Shabyt» bı toby jáne basqalar qoldaý kórsetti.
Aıta ketelik, «Saıabaqtar sherýi» jyl saıyn ótkiziledi jáne tabıǵat aýmaqtary - qoryqtar, ulttyq saıabaqtar, tabıǵat eskertkishteri jáne memlekettik óńirlik saıabaqtardyń saqtalýyn qoldaıtyn adamdardy biriktiredi. 
