«Medeý» shatqalyndaǵy daýyldyń saldarynan bolǵan jaǵdaıdy qalpyna keltirýge 20 mıllıon teńge bólý kózdelip otyr - AShM
ASTANA. 10 aqpan. QazAqparat - «Aýyl sharýashylyǵy mınıstrliginde Іle Alataý qoryǵynyń tabıǵı keshenderin qalpyna keltirý máseleleri boıynsha keńes ótti»,-dep habarlaıdy vedomstvonyń baspasóz qyzmeti.
Keńes barysynda «Medeý» shatqalynda qatty jeldiń saldarynan zardap shekken ormandardy qalpyna keltirý jumystary men erozııaǵa qarsy is-sharalardyń jobasy talqylandy. Jobanyń maqsaty Іle Alataýy memlekettik ulttyq tabıǵı qoryǵynyń tabıǵı keshenderin qalpyna keltirý bolyp tabylady. Byltyrǵy 17 mamyrda bolǵan oqıǵalardyń saldarynnan «Medeý» shatqalynda jel men daýyl qulatqan aǵash kólemi 96 myń tekshemetr boldy.
Ústimizdegi jylǵy 9 aqpandaǵy jaǵdaı boıynsha 45 ga alqapta jel qulatqan 16 myń tekshemetr súrek jınaldy. Іle Alataýy Memlekettik ulttyq tabıǵat parkinde jel qulatqan aǵashtardy tazartý jumystaryna 198 adam jáne aǵash daıyndaý tehnıkasynyń 61 birligi jumyldyrylǵan. Sonymen birge, Іle Alataýy parkinde ótken jyly bolǵan daýyldyń zardaptaryn joıý maqsatynda ormandardy qalpyna keltirýdiń jumys jobasyn ázirleý jóninde «Kazgıproleshoz» respýblıkalyq memlekettik kásipornymen arnaıy shart jasaldy.
Jobaǵa sáıkes, aımaqta bıiktik beldeýine, topyraq erekshelikterine, taý betkeıleriniń qoljetimdiligi men qııalyǵyna, qalpyna keltirý tásiline baılanysty jańadan otyrǵyzý úshin shyrshanyń, qaıyńnyń, shetenniń jáne butalardyń iri jáne usaq kóshetterin paıdalaný josparlanyp otyr. Aǵash otyrǵyzylatyn jerdiń jalpy kólemi 200 gektardy quraıdy, onyń ishinde 10 ga jerge kóshetter otyrǵyzylady.
Sondaı-aq, ormandardyń tabıǵı jańarýyna járdemdesýge arnalǵan is-sharalar ótkizý josparlanýda. Jalpy alǵanda tabıǵat keshenderin qalpyna keltirýge respýblıkalyq bıýdjetten 20 mln. teńge mólsherinde qarajat kózdelgen. Qalpyna keltirý is-sharalary 2012-2014 jyldary júrgiziledi. Aǵash otyrǵyzý jumystaryn jelsulatpasynan keıin tazartý aıaqtalǵan ýchaskelerde 2012 jyldyń sáýir-mamyr aılarynda bastalady.
