Medeý shatqalynda oryn alǵan órttiń saldaryn joıýǵa almatylyqtar 65 mln. teńge jınady
ALMATY. 26 qyrkúıek. QazAqparat - «Biz barlyǵymyz ásem qalamyzdy maqtan tutamyz, shaharymyzdy taýsyz elestete almaımyz. Qazirgi ýaqytta biz taýlarǵa kómektesýimiz qajet», - dedi búgin Almatyda «Bizdiń taýlarǵa kómekteseıik!» aktsııasyna arnalǵan
qaıyrymdylyq keshinde ońtústik astananyń ákimi Ahmetjan Esimov.
«Bul aktsııaǵa turǵyndar qyzyǵýshylyq tanytyp, beı-jeı qaramady. Tipti olar tabıǵattyń «zulym» kúshimen kelgen apat saldaryn joıýǵa qatysýǵa daıyn ekendikterin jetkizdi. Almatylyqtar bul jerde belsendilik pen qamqorlyq tanyta bildi», - dedi A. Esimov. Ol sondaı-aq bul kúnderdiń ishinde qordyń arqasynda 65 mln. teńge qarajat jınalǵandyǵyn atap ótti.
«Qarajat tazalaý jumystaryna, qar kóshkinin ustap turatyn qurylǵylardyń ornalastyrylýy men Medeý shatqalynda ornalasqan Mohnatka jáne basqa da shyńdarda kóshetteý jumystaryna bólinedi», - dep atap ótti qala basshysy.
