Medeý shatqalynda 100-den asa kóshet otyrǵyzyldy
ALMATY. QazAqparat - Almatyda Medeý shatqalynda 100 kóshet otyrǵyzyldy. Igi bastama qalalyq jasyl ekonomıka basqarmasynyń jyl saıynǵy «Saıabaqtar sherýi» tabıǵatty qorǵaý aktsııasy sheńberinde júzege asty, dep habarlaıdy QazAqparat tilshisi.
JOO stýdentteri terek, úıeńki, qaraǵaı jáne qaıyń aǵashtarynyń 100-den asa kóshetin otyrǵyzdy.
«Saıabaqtar sherýi» - ulttyq qoryqtar men saıabaqtardy qoldaýǵa baǵyttalǵan halyqaralyq tabıǵatty qorǵaý aktsııasy. Ol jyl saıyn ótkiziledi jáne qoǵamdyq sıpatqa ıe. Sonymen qatar, erekshe qorǵalatyn tabıǵı aýmaqtardy, qoryqtardy, memlekettik óńirlik jáne ulttyq saıabaqtardy qoldaý ıdeıasy tóńireginde barlyq tabıǵatsúıer adamdardy biriktiredi. Aktsııanyń maqsaty - Almatynyń biregeı, ósimdikter áleminiń baılyǵyna, erekshe qorǵalatyn tabıǵı aýmaq bolyp esepteletin «Medeý» memlekettik óńirlik tabıǵat parkine turǵyndardyń, qonaqtardyń jáne jastardyń nazaryn aýdartý», - deıdi uıymdastyrýshylar.
Almaty TJD «Órt sóndirý jáne apattyq-qutqarý qyzmetiniń» sarbazdary «Medeý» parki qyzmetkerlerimen birlesip, órtke qarsy oqý-jattyǵý ótkizdi. Taýly jerde shyqqan órtti sóndirý joldaryn kórsetti. Barlyq qatysýshylarǵa taýda órt qaýipsizdigi erejelerin saqtaýdy eske saldy.
Esterińizge salsaq, «Jasyl Meken» jalpyqalalyq aktsııasy sheńberinde 13 sáýirde 7 myńdaı aǵash otyrǵyzylǵan bolatyn, al sáýir aıynyń basynda Jeltoqsan kóshesinen Qojanov kóshesine deıin ál-Farabı dańǵylynyń boıyndaǵy jol bólý jolaǵynda 800-deı aǵash otyrǵyzyldy.
Jalpy, Almaty qalasy ákimdigi bastaǵan «Jasyl Meken» jalpyqalalyq aktsııasynyń sheńberinde kóktemniń sońyna deıin qalanyń barlyq aýdandarynda 12 myńnan astam aǵash egý josparlanǵan.
