Medeý muzaıdynynda tanymal mánerlep syrǵanaýshylar óner kórsetti
ALMATY. Qazaqparat- «Medeý» muz aıdynynyń 50 jyldyǵyna oraı keshen aýmaǵynda mánerlep syrǵanaýdan Olımpıada oıyndary men álem chempıonatynyń jeńimpazdary, belgili sportshylar tamasha shoý kórsetti, dep habarlaıdy QazAqparat tilshisi.
Saltanatty merekege Reseıdiń mánerlep syrǵanaýdan tanymal sport juldyzdary Roman Kostomarov, Evgenııa Medvedeva, Tatıana Totmıanına, Maksım Marının, Oksana Domnına, Maksım Shabalın jáne Morıs Kvıtelashvılı arnaıy keldi.
Eki dúrkin álem chempıony jáne Olımpıada oıyndarynyń eki dúrkin kúmis júldegeri Evgenııa Medvedeva Igor Krýtoıdyń mýzykasyna jazylǵan Dımash Qudaıbergenniń oryndaýyndaǵy «Your Love» ánine bıledi.
Mereke qazaqstandyq sportshylar men jattyqtyrýshylardyń sherýimen ashylady. Saltanatty sharada qazaqstandyq mánerlep syrǵanaýshy, 2019 jylǵy álem chempıonatynyń kúmis júldegeri, 2019 jylǵy Qysqy Ýnıversıadanyń kúmis júldegeri jáne II Qysqy jasóspirimder Olımpıadasynyń qola júldegeri Elızabet Tursynbaeva óner kórsetedi.
Baspasóz máslıhaty barysynda Elızabet Medeýdi jaqsy kóretinin aıtty.
«Men osy saltanatty sharaǵa qatysyp jatqanyma óte qýanyshtymyn. Men Medeýdi shyn júregimmen jaqsy kóremin. Bul muz aıdynyna kez kelgen kúnim merekege aınalady.Medeý basqa muz aıdyndarynan atmosferasymen, kólemimen erekshelenedi, eń bastysy ornalasqan jeri – taý. Bul erekshe jer. Mundaǵy muz óte jaqsy. Sapasy jabyq kásibı muz aıdyndarynan kem túspeıdi», - dedi ol.
Onyń aıtýynsha, sońǵy ýaqytta Qazaqstanda mánerlep syrǵanaý jaqsy damyp keledi. Sonymen qatar, ol qańtar aıynda óz akademııasyn ashatynyn málimdedi.
Sharanyń resmı ashylýynda Almaty qalasy ákiminiń orynbasary Arman Qyryqbaev barsha almatylyqtardy sport kesheniniń 50 jyldyq mereıtoıymen quttyqtap, Medeý álemdegi eń jaqsy, eń ádemi jáne eń bıik muz aıdyny ekenin atap ótti.
«Medeý – aty ańyzǵa aınalǵan muz aıdyny. 50 jylda munda 350-den astam álemdik rekord ornatyldy», - dedi Almaty qalasy ákiminiń orynbasary.
Sonymen qatar, ol aldaǵy birneshe jylda Medeýde qaıta jóndeý jumystary júrgiziletinin tilge tıek etti.
«Búkil elimizdiń mádenı murasynyń bir bóligi bolyp tabylatyn sáýlettik kelbet saqtalady, tirshilikti qamtamasyz etýdiń barlyq júıeleri men ınfraqurylymy tolyǵymen ózgeredi. Súıikti muz aıdynynyń ómirinde jańa kezeń bastalady dep oılaımyn», - dep qosty ol.
Mereke aıasynda Anastasııa Ignatevanyń dırıjerlik etýimen aty ańyzǵa aınalǵan «Muzdy sımfonııa» baleti men Ilıa Overbýhtyń «Júrek te janyp tur» gala-shoýy ótti.
Sondaı-aq, qonaqtar qazaqtyń tuńǵysh muz shoýy «Olumpic Show» qoıylymyn tamashalady.
Muz aıdynyndaǵy shoý merekelik túngi otshashýmen aıaqtalady.
