«Medeý» muzaıdynyn jańǵyrtý jumystary 2027 jyly aıaqtalady

ALMATY. KAZINFORM – Almaty ákiminiń orynbasary Beıbit Shahanov «Medeý» muz aıdynyn jańǵyrtý jobasy qalaı júzege asyrylatynyn aıtty.

Onyń sózinshe, qazirgi ýaqytta jobalaý-smetalyq qujattama ázirleıtin uıymymen kelisimshart jasalǵan. Al muzaıdynnyń ózinde qoldanystaǵy qurylymdardy bólshekteý jáne qurylys alańyn daıyndaý jumystary júrgizilip jatyr.

— Negizgi mindet — «Medeýdiń» tarıhı kelbetin saqtaý. Sebebi bul — bizdiń qalamyzdyń sımvoly. Muzaıdyn aınalasyn barynsha jaqsartýdy josparlap otyrmyz: adamdardyń yńǵaılylyǵy úshin bıikten qaraý alańy salynady jáne osynda buryn bolǵan tarıhı basseın qaıta qalpyna keltiriledi, — dedi Beıbit Shahanov.

Aıtýynsha, jańǵyrtý jumystary aıasynda ınjenerlik jeliler tolyq aýystyrylady. Aldymen, salqyndatý jabdyqtary jańartylady, bul muzdy uzaq ýaqyt saqtaýǵa múmkindik beredi. Odan bólek nysanda zamanaýı aqparattyq tehnologııalar engiziledi.

— Rekonstrýktsııa eki jylǵa eseptelgen. Biz jumysty bıyl kúzde bastap, 2027 jyldyń kúzine qaraı aıaqtaýdy josparlap otyrmyz. Osylaısha, 2027–2028 jyldardyń qysqy maýsymyna qaraı muzaıdynyn ashýdy kózdep otyrmyz, — dedi qala ákiminiń orynbasary.

Eske salaıyq, «Medeý» muz aıdyny bıyl kóktemnen bastap birneshe jylǵa jabyldy.

Sondaı-aq «Medeý» muz aıdynyn qaıta jańartý tujyrymdamasy ázirlendi.