«Medeý» muz aıdynynda konkı tebýdi tegin úırenýge bolady
ALMATY. QazAqparat - «Medeý» muz aıdynynda «Sporttyq Almaty» baǵdarlamasy aıasynda qala turǵyndary men qonaqtaryna tegin konkı tebýdi úırený sabaqtary jalǵasýda, dep aqparattyq jáne sporttyq HAB habarlaıdy.
Ańyzǵa aınalǵan «Medeý» qonaqtary tek konkı teýip qana qoımaı, shara uıymdastyrýshylarymen birge kóterińki kóńil-kúıde boldy. Sahnada kez kelgen kelýshi óleńder oqyp, ózderiniń bılerin kórsetti.
Olardyń arasyndaǵy úzdik án kórermenderdiń kómegimen anyqtaldy. Jeńimpazdar ártúrli baǵaly syılyqtar men konkılermen marapattaldy.
Osy senbi «Medeýge» dástúr boıynsha kóp adam jınaldy. 20-ǵa jýyq arnaıy kók kıim kıgen nusqaýshylar barlyqtaryna óz bilgenderin úıretip, kóptegen keńester aıtty.
«Men konkımen syrǵanap júrgenime 5 jyl boldy. Nusqaýshy bolamyn dep, ózimniń sheberligimdi arttyrdym. Maǵan adamdarǵa sabaq bergen unaıdy. Olarǵa keńesimdi berip turamyn. Eń bastysy ol árıne qyzyǵýshylyq pen ynta. Sonymen qatar, kóbisi konkı tańdaýdan qatelesip jatady, jáne ózderiniń tepe-teńdikterin saqtaı almaıdy. Onyń bári túzeledi, tek talaptanyp, qoryqpaý kerek», - dep nusqaýshylardyń biri Dmıtrıı Podporın óz keńesimen bólisti.
Aıta keter jaıt, baǵdarlama saǵat 19:00-den 21:00-ge deıin ár aptanyń senbi kúnderi osy muz aıdynynda ótkiziledi. Muz aıdynyna kirý aqyly. Kirý bıleti men konkıdi jalǵa alý baǵalary «Medeý» muz aıdynynyń baǵa kórsetkishi boıynsha júrgiziledi.
Bul tegin konkı tebýge úıretý baǵdarlamasy osy jyldyń sońyna deıin jalǵasady. Onyń maqsaty qala turǵyndaryn salaýatty ómir saltyna beıimdeý bolyp tabylady.
