«Medeý» muz aıdynyn jańǵyrtý jobasy: ekopark pen 3D mýzeı salynady
ALMATY. KAZINFORM — «Medeý» muz aıdynyn jańǵyrtý jumystary aıasynda jańa jobalar júzege asyrylmaq.
Bul týraly Qala qurylysyn baqylaý basqarmasy habarlady. Vedomstvo málimetinshe, sporttyq nysanda daıyndyq kezeńinen aldaǵy ýaqytta qurylys aımaǵy qorshalyp, negizgi jumystar bastalady.
Joba aıasynda muz aıdynyna arnalǵan jańa tońazytqysh júıesi ornatylady, ınjenerlik kommýnıkatsııalar tolyq jańartylyp, keshen gazben qamtamasyz etiledi.
— Muzdyń sapasy men jaǵdaıyn naqty ýaqyt rejıminde baqylaıtyn jasandy ıntellekt júıesi energııa tutynýyn 25%-ǵa deıin azaıtýǵa múmkindik beredi. Sondaı-aq kórermenderge arnalǵan jyly oryndyqtar qoıylady, — dep habarlady basqarma.
Jobaǵa sáıkes, «Medeýdiń» shyǵys qanatyndaǵy qonaq úı «tórt juldyz» standartyna saı qaıta jobalanady. Al sportshylar men týrısterge arnalǵan zamanaýı ońaltý ortalyǵy ashylady. Onda saýna, massaj bólmeleri jáne shuǵyl ári profılaktıkalyq kómek kórsetýge arnalǵan medıtsınalyq bólim jumys isteıdi.
Sondaı-aq keshen aýmaǵynda «3D» tujyrymdamasyna negizdelgen ınteraktıvti mýzeı ekspozıtsııasy jasaqtalady. Ol zamanaýı mýltımedııalyq jáne kórme jabdyqtarymen tolyq qamtylady. Batys trıbýnada aýmaǵy 900 sharshy metr bolatyn kofehanalary men demalys oryndary bar keń terrasa paıda bolady.
Odan bólek burynǵy mashına zalynyń mańynda kólemi 25×15 metr, jyly sýy bar ashyq basseın salynady. Adamdardyń yńǵaılyǵy úshin trıbýna men qabyldaý bólmesi, kıim aýystyratyn bólmeler jáne qyzmet kórsetý ǵımaraty qarastyrylǵan. Jańa basseın jyl boıy jumys isteıtin bolady.
— Keshenniń aınalasynda serýen joldary bar erekshe ekopark salý josparlanǵan. Ol jerden jasandy sarqyrama, Kishi Almaty ózeni men taýdyń ásem kórinisin tamashalaýǵa bolady. Negizgi nysandardy jáne jańa demalys aımaqtaryn baılanystyratyn shyǵys jáne batys baǵyttarda júrginshilerge arnalǵan eki kópir salynady, — dep habarlady vedomstvo.
Eske salaıyq, «Medeý» muz aıdyny ótken syrǵanaý maýsymynan keıin jabyldy.
Muz aıdynyn jańǵyrtý jumystary 2027 jyly aıaqtalady.