«Medeý» muz aıdynyn qaıta jańartý tujyrymdamasy ázirlendi

ALMATY. KAZINFORM – Almaty ákiminiń orynbasary Azamat Qaldybekov «Medeý» muz aıdynyn qaıta jańartý jobasy iske asyryla bastaǵanyn aıtty. 

Onyń aıtýynsha, jobanyń basty maqsaty – Almatynyń sporttyq jáne týrıstik áleýetin arttyrý, al arenanyń tarıhı kelbetin saqtaý – basty basymdyq bolyp qala beredi.

– «Medeý» muz aıdynyn qaıta jańartý tujyrymdamasy ázirlendi. Arenany jańǵyrtý kezinde zamanaýı tehnologııalar qoldanylady, biraq tarıhı beınesi saqtalady. Qazirgi tańda jumystar bastaldy. Qalalyq sport basqarmasynyń basshylyǵymen birge rekonstrýktsııa kezeńinde ornatylatyn qorshaýlar kelisildi. Almaty taý klasterin damytý aıasynda «Medeý» negizgi nysandardyń biri bolatynyna senimdimin, - dedi Qaldybekov.

Eske salaıyq, buǵan deıin muz aıdynyn qaıta jańartý jumystary EPC-kelisimshart (Engineering, Procurement, Construction – jobalaý, jabdyqtaý jáne qurylys) aıasynda 2025-2027 jyldary júrgiziletini belgili bolǵan edi. Sondaı-aq jóndeý jumystaryna baılanysty «Medeý» muz aıdyny osy syrǵanaý maýsymynan keıin birneshe jylǵa jabylatynyn habarlaǵan edik. 

Almaty ákimdigi «Medeý» aýmaǵyn jańǵyrtý boıynsha birqatar jumys júrgiziletinin habarlady.

Olar:

• muz aıdynynyń batys bóliginde serýendeý alleıasyn qurý;

• aıdyn aınalasynda jaıaý júrginshilerge arnalǵan baspaldaqtar ornatý;

• ońtústik betkeıde, ıaǵnı Esentaı ózeniniń oń jaǵalaýy boıymen kórkeıtý jumystaryn júrgizý;

• múmkindigi shekteýli azamattarǵa yńǵaıly bolýy úshin ońtústik-shyǵys jáne ońtústik-batys bóliginde eki jedel saty ornatý kózdelgen. 

Eske sala keteıik, buǵan deıin «Medeý» muz aıdyny qalaı jańartylatynyn jazǵanbyz.