«Medeý» muz aıdyny halyqaralyq jarystar ótkizýge laıyqty bolady
ASTANA. KAZINFORM – «Medeý» bıik taýly muz aıdynyna jóndeý jumystary júrgiziledi. Bul jaıynda Májilis depýtattarynyń saýalyna Premer-mınıstr Oljas Bektenovtiń jaýabynda aıtylǵan.
- Almaty qalasyn 2025 jylǵa deıin jáne orta merzimdi keleshekte 2030 jylǵa deıin damytý baǵdarlamasyna sáıkes, 2025-2027 jyldary jergilikti bıýdjet qarajaty esebinen Medeýdi jańǵyrtý josparlanǵan. Búginde bıýdjet zańnamasyna sáıkes protsedýralar júrgizilip jatyr, - dedi Úkimet basshysy.
Onyń atap ótýinshe, nysandy jańǵyrtý arenanyń tehnıkalyq sıpattamasyn jaqsartady. Osylaısha, Medeý konkımen júgirý sporty men mánerlep syrǵanaýdan halyqaralyq jarystar ótkizý úshin Halyqaralyq konkımen júgirý odaǵynyń talaptaryna saı bolady.
Sonymen qatar Almaty qalasynyń ákimdigi muz aıdynyn jańǵyrtý aıasynda onyń dopty hokkeıden jarystar ótkizý, muzdaǵy shoý syndy túrli mádenı-sporttyq buqaralyq is-sharalardy ótkizý múmkindikterin keńeıtýge baǵyttalǵan sharalar qabyldaıdy.
«Medeý» muz aıdynynyń aınalasynda jańa alleıalar men serýendeýge arnalǵan joldar paıda bolatynyn jazǵan bolatynbyz.