Medeý memlekettik óńirlik tabıǵı saıabaǵy aýmaǵynda Almaty turǵyndary men qonaqtary tegin júrip-turmaq
ALMATY. 29 aqpan. QazAqparat - Búgin Almatyda 5-saılanǵan qalalyq máslıhattyń 3-sessııasynda «Medeý» memlekettik óńirlik tabıǵı saıabaǵyna kirý tólemaqysyn alyp tastaý týraly sheshim qabyldandy.
Sessııada qalalyq tabıǵat resýrstary jáne tabıǵatty paıdalanýdy retteý basqarmasynyń bastyǵy Altaı Rahymbetov «4-saılanǵan qalalyq máslıhattyń 50-sessııasynyń 2011 jylǵy 7-jeltoqsandaǵy №492 «2012 jyla arnalǵan erekshe qorǵalatyn tabıǵı aýmaq «Medeý» memlekettik óńirlik tabıǵı parkin paıdalanýǵa tólemaqy mólsherlemelerin bekitý» týraly sheshimine ózgerister engizý týraly baıandama jasady. Altaı Erǵazyulynyń aıtýynsha, buryn saıabaq aýmaǵynda árbir kólikten 300 teńge kóleminde tólemaqy alynatyn bolǵan. 7-qysqy Azııa oıyndary qarsańynda júrgizilgen jóndeý jumystarynan keıin Medeý jáne Shymbulaq sport nysandaryna keletin adamdar sany ósýde. Kólikti turaqqa qoıý aqyly bolǵandyqtan qala turǵyndary tarapynan Medeý parki aýmaǵyna kirgeni úshin alynatyn aqyny tóleýdi alyp tastaý týraly kóptegen ótinishter kelip túsýde. Almaty qalasynyń týrıstik áreketin damytý maqsatynda nóldik tólemaqy mólsherlemesin engizý týraly usynysqa máslıhat depýtattary da biraýyzdan qoldaý kórsetti.
