«Medeý» aýmaǵynda áýege kóterilgen tikushaq adamdarǵa qaýip tóndirdi

ASTANA. KAZINFORM — «Qazavıaqutqarý» AQ baspasóz qyzmeti «Medeý» aýmaǵyndaǵy tikushaqtyń oqys ushýyna qatysty resmı túsinikteme berdi.

Mekemeniń málimetinshe, «Medeý» sport kesheni mańyndaǵy resmı alańnan tikushaq aldyn ala berilgen ótinim boıynsha josparly ushýdy oryndaǵan. Al áýe bortyn biliktiligi rastalǵan tájirıbeli ushqysh basqarǵan.

— Ushý aldynda bort mehanıgi azamattarǵa qaýipsiz qashyqtyqty saqtaý qajettigi týraly eskertý jasaǵan. Aldyn ala málimetter boıynsha, ushý kezinde jel jyldamdyǵy kúrt artyp, baǵyty ózgergen, bul áýe kemesiniń shaıqalýyna áser etýi múmkin. Oqıǵanyń sebepteri ishki tekserý aıasynda anyqtalyp jatyr. Jedel den qoıý brıgadasy áýe kemesin tekserip, tehnıkalyq aqaýlar anyqtalǵan joq, — delingen «Qazavıaqutqarý» AQ habarlamasynda.

Buǵan deıin Almatyda turǵyn úılerge jaqyn qashyqtyqta tikushaq ushyp júrgeni belgili boldy. TJD bul jaǵdaıǵa qatysty túsinikteme jasady.