Medeý aýdandyq demalys ortalyqtary balalarǵa merekelik syı jasady
ALMATY. Maýsymnyń 1-i. QazAqparat /Erbol Turymbetov/ - Búgin Almaty qalasy Medeý aýdandyq demalys ortalyqtary men «Báıterek» demalys ortalyǵy jáne birqatar jastar uıymdary birlesip Balalardy qorǵaýdyń halyqaralyq kúnine arnalǵan merekelik shara ótkizdi,
dep habarlaıdy QazAqparat.
60 jyldan beri toılanatyn bul ataýly kún balalardy qaýip-qaterden qorǵaý, densaýlyq pen tárbıege baýlý jáne olardyń tártibi men bilimge qushtarlyǵyn júzege asyrýǵa baǵyttalǵan. Osyǵan baılanysty, atalmysh demalys ortalyqtary qalalyq Jastar saıasatyn damytý memlekettik qory jáne «Qazaqstannyń jańa talanttary» qoǵamdyq uıymdarymen birigip merekelik shara ótkizdi.
Respýblıka saraıynyń aldy - Abaı alańynda bastalǵan jıynda Medeý aýdany ákiminiń orynbasary Berik Mustafın sóz sóılep, qatysýshylardy mereıli kúnimen quttyqtady. Sondaı-aq, dúnıe esigin endi ashyp jatqan sábılerdiń Týý týraly kýálikterin tabys etti. Jas talanttardyń talabyn shyńdaý, jasóspirimder arasynda salaýatty ómir saltyn qalyptastyrýdy maqsat tutqan bul merekede balalar úshin ár túrli jarystar uıymdastyrylyp, jeńimpazdar marapattaldy.
Sharanyń kelesi bóligi qalalyq Ortalyq mádenıet jáne demalys saıabaǵynda 8 synyp oqýshylary arasynda ótken basketbol saıysymen jalǵasty. Saltanat sońy «Báıterek» demalys ortalyǵynda aýla kúnin ótkizýmen aıaqtaldy.
