Medbıkelerge talap kúsheıedi - Eljan Birtanov
«Elimizde medbıke daıarlaıtyn 76 medıtsınalyq kolledj bar, onyń 25%-y - memlekettik, qalǵany - jekemenshik. Jekemenshik basym bolǵandyqtan, bul bir bıznes túrine aınalyp ketti. Eń bastysy - lıtsenzııa bar, onyń sapasyna bári birdeı mán bere bermeıdi. Bul mańyzdy másele, óıtkeni, kóp praktıkalyq jumystardy meıirbıkeler isteıdi, sondyqtan kadr sapasy osy jerge aqsaıdy. Osy turǵyda biz kelesi jyldan bastap syrtqy táýelsiz komıssııa arqyly medıtsına mamandaryn qosymsha emtıhan arqyly ekspertızadan ótkizý talabyn engizemiz. Qazir atalǵan ózgeriske qatysty zań jobasy májilistiń qaraýynda. Zań qabyldanǵan soń medıtsınalyq kolledjderdi aıaqtaǵan medbıkeler arnaıy táýelsiz emtıhan tapsyryp, sonyń nátıjesinde mamanǵa lıtsenzııa beriledi. Bilimin dáleldeı almaǵan maman lıtsenzııasyz qalady, osylaısha meıirbıkelerge talapty kúsheıte otyryp, medıtsınalyq qyzmettiń sapasyn kótergimiz keledi», - dedi E.Birtanov.
Mınıstr keltirgen derekterge súıensek, búginde el boıynsha medıtsına mamandyǵyn bitirgen stýdentterdiń tek 60-70% ǵana óz mamandyǵymen jumys isteıdi, qalǵany basqa salaǵa ketedi.
Sonymen qatar, mınıstr medıtsına qyzmetkerleriniń jalaqysy máselesine de toqtaldy.
«Medıtsına qyzmetkerliriniń tapshylyǵy jalaqydan týyndap otyrǵanyn bárimiz bilemiz. Osy turǵyda aıtarym - mınıstrliktiń densaýlyq saqtaý baǵdarlamasyndaǵy ındıkatorǵa sáıkes, 2019 jyly eńbekaqyny jalpy ekonomıkalyq ólshemmen 10%-ǵa kóterý josparda tur. Odan bólek, ár óńirdiń ózindik ortasha jalaqy esebi bar, biz ony baqylaýda ustap otyrmyz. Aı saıyn memlekettik mekemelerdegi jalaqy máselesine qatysty esep júrgizilýde», -dedi ol.
Mınıstrdiń aıtýynsha, búgingi kúni memlekettik medıtsınalyq mekemelerdiń 85%-nyń jalaqyny óz betinshe sheshim qabyldap, kóterý múmkindigi bar, ony memleket bekitpeıdi.
Eń joǵary jalaqy alatyn óńir retinde mınıstr BQO-ny atasa, tómengi jalaqy kólemi SQO-da bolyp shyqty.