Medbıkelerdiń jalaqysyn kóterýge múmkindik bar - Birtanov

ASTANA. QazAqparat - QR Densaýlyq saqtaý mınıstri Eljan Birtanovtyń aıtýynsha, mindetti áleýmettik medıtsınalyq saqtandyrý júıesi aıasynda belgili bir emxanada qyzmet kórsetý sapasy joǵary bolsa, patsıentterdiń sany da kóbeıedi. Al patsıentter kóp jerge qordyń aqshasy kóptep bólinedi. Osynyń arqasynda qarapaıy medbıkelerdiń jalaqysyn kóterýge múmkindik bar, dep xabarlaıdy QazAqparat tilshisi.

"Negizi biz mindetti áleýmettik medıtsınalyq saqtandyrý júıesi tolyǵymen engizilgennen keıin dárigerler men meıirbıkelerdiń jalaqysy ósedi dep senemiz. Halyq medıtsınalyq qyzmetterdi óz erkimen tańdaǵanda medıtsına salasyndaǵy uıymdardyń arasynda básekelestik qyza túsedi. Al medıtsınalyq qyzmettiń sapasy joǵary jerde patsıentter kóp bolady. Ondaı mekemeler saqtandyrý qorynan aqshany da kóptep alady. Sonda jalaqyny kóterýge múmkindik bolady",- dedi Birtanov Úkimet otyrysynan keıingi baspasóz máslıxatynda.

Onyń aıtýynsha, qazirgi kezde mınıstrlik medıtsına qyzmetkerleriniń jalaqysyn bekitpeıdi. Ony emxana men aýrýxanalardyń bas dárigerleri sheshedi. "Olar mekemeniń kiristerine qaraı jalaqyny taǵaıyndaıdy. Árıne, aldaǵy ýaqytta ákimshilik shyǵyndardy qysqartýdyń arqasynda jalaqyny kóterýge qosymsha múmkindikter ashylady", - dep atap kórsetti mınıstr.