Medbıkelerdiń qyzmeti árdaıym suranysta – dáriger

ALMATY. QazAqparat - Jyl saıyn 12 mamyr – Halyqaralyq meıirbıkeler kúni retinde atalyp ótiledi. Bul halyqaralyq mereke meıirbıke kásibiniń negizin qalaýshy ulybrıtanııalyq Florens Naıtıngeıldiń qurmetine belgilengen, dep habarlaıdy QazAqparat tilshisi.

Almatydaǵy Kardıologııa jáne ishki aýrýlar ǵylymı-zertteý ınstıtýty basqarma tóraǵasynyń orynbasary Qurmanǵazy Madalıevtiń pikirinshe, meıirbıkelerdiń qyzmeti árdaıym suranysta, kez kelgen medıtsına uıymynda olardyń ornyn birde-bir maman almastyra almaıdy.

«Meıirbıkelerdiń mamandyǵy óte mańyzdy. Bul zamanaýı jan-jaqty bilimdi, mamandyǵy boıynsha daǵdylardy meńgerýdi, tózimdilik pen shydamdylyqty, ózgege janashyrlyqpen qaraýdy talap etedi. Meıirbıkelerge júktelgen mindetter onyń mamandyǵyn san qyrly etedi. Medıtsına qyzmetkerleriniń osy sanaty patsıent jáne onyń otbasyna jaqyn. Meıirger komandalyq jumysta negizgi oryndy alady jáne alýy tıis»,- deıdi dáriger.

Sonymen qatar ol ujymda meıirger jigitter de jumys isteıtinin jetkizdi.

«Bizde meıirger jigitter de bar. Olar óz jumystaryna úlken jaýapkershilikpen qaraıdy. Sondaı- aq klınıka basshylyǵy dárigerler men orta medıtsına personalynyń kásibı turǵydan ósýi úshin barlyq qajetti jaǵdaılardy jasap otyr. Mamandar turaqty túrde alys jáne jaqyn shet elderde ózderiniń biliktiligin arttyryp otyrady. Mysaly, ınstıtýttyń 16 qyzmetkeri, onyń ishinde dárigerler de, orta medıtsına qyzmetkerleri de bar, 2021 jyldyń jeltoqsan aıynda álemniń eń úzdik klınıkalarynyń ondyǵyna kiretin «Shıba Tel-Hashomer» (Tel Avıv, Izraıl) medıtsına ortalyǵynda biliktiligin arttyrdy»,- dedi Qurmanǵazy Madalıev.

Spıker áriptesterin Halyqaralyq meıirbıkeler kúnimen quttyqtady.

«Adamdardyń belsendi eńbek etýine, olardyń ómirge qaıta oralýyna kómek berip, olarǵa qýanysh pen úmit syılaıtyn meıirgerlerdiń eńbekterine tabys tileımin, kásibı sheberlikke qol jetkizýdi, zor densaýlyq pen otbasylaryńa amandyq tileımin», - dedi ol.