Medbıkeler naýqastyń densaýlyǵyna dárigerden kem jaýap bermeıdi - maman
ALMATY. QazAqparat – Dáriger eminiń nátıjeli bolýy medbıkeniń múltiksiz qyzmetine baılanysty. Mundaı pikirdi Almaty qalasyndaǵy Áleýmettik ońaltýdy damytýdyń ǵylymı-tájirıbe ortalyǵy medbıkesi Svetlana Iskandarova bildirdi, dep habarlaıdy QazAqparat tilshisi.
Keıipkerimiz Svetlana Iskandarovanyń aıtýynsha, bala kúngi armany - dáriger bolý edi. Alaıda, ártúrli sebeppen medıtsınalyq joǵary oqý ornyna túse almaǵan.
«Men medbıke bolam dep oılaǵam joq. Bala kúngi armanym - dáriger bolý edi. Alaıda, medıtsına ınstıtýtyna oqýǵa túse almadym. Konkýrstan ótpeı qaldym. Sondyqtan ýaqytty beker joǵaltpaıyn dep medıtsınalyq ýchılışege tústim. Oqýymdy tamamdaǵan soń otbasylyq jaǵdaıǵa baılanysty Almatydan ketýim kerek boldy. Joldasymdy joldamamen aýylǵa jiberdi. Sol jaqta eńbek jolymdy bastadym»,-deıdi ol.
Medıtsına salasyna 35 jylyn arnaǵan medbıke qazir osy mamandyq ıesi bolǵanyna esh ókinbeıdi. Kerisinshe qýanady.
«Maǵan óz jumysym qatty unaıdy. Eń birinshi adamdarǵa kómektesemiz. Olardy tyńdaımyz. Bireýge kishkene bolsa da6 paıdań tıse, odan asqan baqyt bar ma? Emdeý mekemelerine kimder keledi? Álbette, dertine shıpa izdegender. Men qazir Almaty qalasyndaǵy áleýmettik ońaltýdy damytýdyń ǵylymı-tájirıbelik ortalyǵynda massajıst medbıkemin. Bizdiń ortalyq sóıleý estý kemistigi bar mýgedek balalarmen jumys isteıdi. ıAǵnı, bizge kishkentaı naýqastar keledi. Balaǵa kómektesý - barlyq adamzattyń paryzy dep oılaımyn. Medıtsına salasynyń mamany bolmasań da, oǵan barynsha qoldaý kórsetesiń ǵoı. Men óz basym balalarǵa patsıent emes, óz balama, nemereme, týysyma qaraǵandaı qamqorlyq tanytamyn. Onyń emine asa úlken jaýapkershilikpen qaraımyn. Kez kelgen ata-ana sábıiniń deni saý bolǵanyn qalaıdy. Óz kásibińe adal bolyp, barynsha qoldaý kórsetseń, ony halyq aıtyp júredi. Shúkir eńbegimizge dán rıza ata-analar sany sheksiz»,–deıdi maman.
Svetlana Iskandarovanyń pikirinshe, kez kelgen adam medıtsına salasynyń mamany bola almaıdy.
«Medıtsına salasyn tańdaǵan adam mamandyǵyna adal, júregi meıirimge toly bolýy kerek. Júregi jyly maman adamnyń tánin ǵana emes, janyn da emdeıdi. Sonymen qatar, dáriger eminiń nátıjeli bolýy medbıkeniń em-domdy ýaqtyly kórsetip, óz mindetin múltiksiz atqarýyna tikeleı baılanysty. Naýqastyń densaýlyǵyna dárigerden kem jaýap bermeıtin de - solar»,- deıdi ol.
