Medbıke naýqastyń kútimine tolyǵymen jaýapty, onyń basty mindeti – meıirim kórsetý
QOSTANAI.QazAqparat – Meıirim men jan jylýy, tózimi men isine beriktigi arqyly naýqastyń keselinen aıyǵýyna úlken yqpal tıgizetin jan – medbıke. Jaýapkershiligi joǵary jumysty abyroımen alyp júrgenderdiń biri – qostanaılyq medbıke Álııa Ótegenova.
Álııa Amantaıqyzy medıtsına salasynda jıyrma segiz jyldan beri úzdiksiz eńbek etip keledi. Qazir oblystyq densaýlyq saqtaý basqarmasynyń Qostanaı qalasy №1 emhanasynda aǵa meıirbıke bolyp jumys isteıdi. Ol dáriger bolýdy bala kezinen armandaǵan.
«Mektep qabyrǵasynda-aq bolashaq mamandyǵymyzdy maqtan etetinbiz. Dáriger bolýdy abyroı emes, halyqqa kómektesý dep túsindim. Nege medbıke jolyna tústim? Negizi medıtsına salasynda «erliktiń kóbin meıirbıkeler jasaıdy» degen támsil bar. Medbıkeler naýqastyń kútim protsesine tolyǵymen jaýapty, sol úshin de basty mindeti – meıirim kórsetý. Biz emdelýshige tolyq kútim qamtamasyz etý úshin kásibı psıhologııalyq jáne rýhanı qasıetterimizdi iske qosamyz. Aýyryp kelgen adamdardy shyn kóńilimmen, meıirimdi júrekpen qarsy alamyn. Adam eńbeginen qýanysh taba bilse, boıyna jańa kúsh qosylady. Osyndaı zor shabytpen jasap júrgen qyzmetim meni bıikke jetkizip otyr», - deıdi medbıke.
Álııa Ótegenova qyzmet etetin qalalyq emhana zamanaýı jabdyqtarmen qamtamasyz etilgen. Bas dáriger Qasymhan Mirjaqypovtyń bastamasymen túrli qoǵamdyq is-sharalarǵa da qatysyp turady.
«Eńbek etip jatqan ujymymdy ekinshi otbasym dep sanaımyn. Tatý, yntymaǵy jarasqan naǵyz sheberler jáne belsendi áriptesterimniń ortasynda qyzmet atqarýdamyn. Qandaı qıyn otalarda, naýqastardyń jany aýyrǵan sátte bir judyryqtaı jumyla ketemiz. Odan qaldy, kez kelgen merekelik is-sharalarda belsendilik tanytyp, birlik kórsetemiz. Eńbegim eleýsiz qalmaıdy. Basshylyq jaǵynan marapattarym bar. Osynaý 28 jylǵy qyzmette túsingenim – adaldyq abyroıǵa jetkizedi. Elime adal qyzmet jasaýdan jalyqpaımyn. Meniń oıymsha, meıirbıkeler únemi izdenis ústinde bolý kerek. Zaman aǵymy ózgerip otyrady. Tipti, adamdardyń túrli minezine qaraı yńǵaı tanytyp, tóze bilýdi óner der edim. Aq halatty abzal jan bolý – men úshin úlken maqtanysh» - deıdi Álııa Amantaıqyzy.
Medbıkeler únemi jumys barysynda júredi. Álııa Ótegenova qoly qalt ete qalsa, balalarynyń janynda bolýǵa tyrysady. Ómirlik jary Asqar janynan tabylady, jumysynyń qaýyrt ekenin túsinedi.
«Úlken qyzym turmysta, Darına atty nemeremiz bar. Ortanshy qyzym - birinshi kýrs stýdenti, Almaty qalasynda oqıdy. Al kenjemiz – Arlan mektepaldy daıarlyq synybynda oqıdy. Men otbasymnyń baqyty úshin, ujymymnyń birligi, halyqtyń saýlyǵy úshin qoldan kelgenin aıamaımyn», - dep túıdi medbıke.
Rasymen de, qarapaıym ǵana jumys bolyp kóringenimen, medbıkeler atqaratyn jumys asqan jaýapkershilikti qajet etedi.
