Medal ıelený ońaı sharýa emes – Elsııar Qanaǵatov qysqy Olımpıada týraly

NUR-SULTAN. QazAqparat – QR Ulttyq olımpıada komıteti sport dırektsııasynyń dırektory Elsııar Qanaǵatov qysqy Olımpıadaǵa qatysyp jatqan qazaqstandyq sportshylardyń nátıjesi týraly pikir bildirdi, dep habarlaıdy QazAqparat.

«Áli de alda jarystar bar, qalashyqta sportshylarǵa bar jaǵdaı jasalǵan. Biz de óz kómegimiz ben qoldaýymyzdy kórsetýge tyrysyp jatyrmyz. Sondyqtan, jankúıerlerge rahmet, sportshylardy jigerlendirip otyrsańyzdar, basqa eshteńe qajet emes», - dedi Elsııar Qanaǵatov ZOOM alańynda ótken baspasóz máslıhatynda.

Spıkerdiń aıtýynsha, sportshylardyń nátıjesine boljam jasaý qıyn.

«Táýelsizdik alǵaly qysqy Olımpıada oıyndarynda bar bolǵany 8 medal jeńip alǵanbyz, onyń tórteýin jalǵyz Vladımır Smırnov alǵan. Medal ıelený ońaı sharýa emes. Frıstaıl-mogýl boıynsha kóptegen elderde birneshe sportshy ǵana biliktilik alady. Al bizdiń elden tórt sportshy oıyn kórsetti. Menińshe, bul da jaqsy jetistik. Árıne, alda áli talaı oıyn bar. Biz úzdik ondyqqa enýge tıis sportshylardyń esimderin birneshe ret atadyq. Biz sizderdi qýantýǵa daıynbyz. Bul salanyń mamandary qysqy sport túrleriniń deńgeıi týraly jaqsy biledi. Elordada konkımen júgirý sporty boıynsha tek «Alaý» muz saraıy ǵana jumys isteıdi. Osyǵan qaramastan, bizdiń sportshymyz álem chempıonatynda ekinshi oryn aldy», - dedi E. Qanaǵatov.

Buǵan deıin Qazaqstan Halyqaralyq olımpıada komıtetiniń bas hatshysy Andreı Krıýkov Beıjiń Olımpıadasyna qatysyp jatqan qazaqstandyq sportshylardyń aralyq nátıjesin baıandaǵan edi.

Frıstaıl-mogýldan Qazaqstan quramasynyń bas bapkeri Elena Krýglyhına júldeden tys qalǵandary úshin jankúıerlerden keshirim surady.

Erteń qazaqstandyq atletter sporttyń 3 túrinen el namysyn qorǵaıdy.