Medal alǵan qazaqstandyq paralımpıadashylarǵa qansha syıaqy beriledi

ASTANA. QazAqparat - Shtattaǵy ulttyq komandalar jáne sporttyq rezerv dırektsııasy dırektorynyń orynbasary Alekseı Krıýchkov «SPORTINFORM» SAA tilshisine bergen suhbatynda Phenchhandaǵy 2018 jylǵy Paralımpıada oıyndarynda medal alǵan qazaqstandyqtarǵa qansha syıaqy beriletinin aıtty.

«Bul másele sheshilgen. Olımpıadalyq komanda sekildi paralımpıadashylar da altyn medal úshin 250 myń dollar alady. «Kúmis» 150 myń dollarǵa baǵalandy, al úshinshi orynmen kelgen sportshyǵa 75 myń dollar beriledi. Budan tys, 4, 5 jáne 6-oryndar úshin de tıisinshe 30, 10 jáne 5 myń dollar mólsherinde syıaqylar berý kózdelgen. Bul máselede Qazaqstan álemde birinshi orynda tur. Árıne, bul da sportshyny yntalandyrýǵa qyzmet etedi, degenmen, negizgisi ol emes dep úmittenemin. Otanǵa degen súıispenshilik bárinen de qymbat», - deıdi Krıýchkov.

Eske sala keteıik, Paralımpıada oıyndary Ońtústik Koreıada 2018 jylǵy 9-18 naýryz aralyǵynda ótedi. Oǵan 670 sportshy qatysady. Jarys baǵdarlamasyna: taý shańǵy sporty, bıatlon, shańǵy jarystary, hokkeı-sledj, snoýbord jáne arbadaǵy kerlıng kirgizilgen.

Qazaqstan atynan Phenchhanda 7 sportshy baq synaıdy. Shańǵy jarystary jáne bıatlon boıynsha Qaırat Qanafın óziniń gıd-sportshysy Anton Jdanovıchpen jarys jolyna shyqsa, Aleksandr Gerlıts, Sergeı Ýssoltsev, Denıs Petrenko, Aleksandr Kolıadın jáne Jańyl Jaltabaeva - barlyǵy tek shańǵy jarystarynda óner kórsetedi.