Metsenattar Jambyl Jabaevqa eskertkish ornatty

TALDYQORǴAN. QazAqparat - Almaty oblysynyń Eńbekshiqazaq aýdany Esik qalasyndaǵy jastar saıabaǵynda jyr alyby Jambyldyń eskertkishi ashyldy. Bıýst «Týǵan jer» baǵdarlamasy sheńberinde metsenat qarjysyna jasaldy, dep habarlaıdy QazAqparat tilshisi.

Aıtýly qýanyshpen kópshilikti oblys ákiminiń orynbasary Jaqsylyq Omar quttyqtady. Shara ánshi Qaırat Bektursynnyń oryndaýyndaǵy Jambyldyń «Aqyndarǵa arnaý» atty termesimen ashyldy.

«Elbasy Nursultan Ábishuly Nazarbaev «Bolashaqqa baǵdar: rýhanı jańǵyrý» baǵdarlamasynda: «Ulttyq mádenıet saqtalmasa, eshqandaı jańǵyrý bolmaıdy», - degen edi. Osy baǵdarlama aıasynda qolǵa alynǵan ıgi isterdiń biri búgingi shara dep bilińizder. Eskertkish - eldiń, halyqtyń mádenı murasynyń jalpylama ataýy. Endeshe, eskertkish qoıylǵan sol tulǵanyń ózi halyqtyń murasyna aınaldy degen sóz. Osyndaı ıgi sharany qolǵa alyp, belsendilik tanytqan, jeke qarajatyn bólgen  jergilikti azamattarǵa kópshiliktiń atynan shynaıy rızashylyǵymyzdy bildiremiz. Uly tulǵaǵa eskertkish ornatý erekshe azamattyq is dep bilemin», - dedi J. Omar óz quttyqtaýynda.

Munan soń Qazaqstan Jazýshylar odaǵynyń tóraǵasy Nurlan Orazalın sóz sóılep, jas aqyn Jambyl Dúısenov jyraýǵa arnaǵan óz óleńin oqydy. Eskertkish aldyna gúl shoqtary qoıyldy.

Bıýstti jasaýǵa metsenattardyń 4,6 mln teńge qarjysy jumsaldy. Eskertkish avtory - Nurǵalym Isabaev. Bıýst qoladan quıylǵan, postamenti - mármárdan, bıiktigi - 5 metr. Aýlasy abattandyrylǵan, tıan-shan shyrshalary otyrǵyzylyp, gúlzar jasalǵan.