Metsenattar ánshi Rýhııa Baıdúkenovaǵa sý jańa kólik syılady

TALDYQORǴAN. QazAqparat - Almaty oblysynyń ákimi Amandyq Batalov halyqaralyq «Vıtebsktegi slavıan bazary» kórkemónerpazdar festıvaliniń jeńimpazy Rýhııa Baıdúkenovany qabyldady, dep habarlaıdy QazAqparat tilshisi.

Odan keıin Rýhııa Baıdúkenova jerlesterimen kezdesti. Taldyqorǵan qalasynyń metsenattary men kásipkerleri oǵan «Hyundai» markaly avtokólik syıǵa tartty. Sondaı-aq, Rýhııanyń ustazy Serikjamal Ájibekova men qoldaýshysy Qymbat Dosjanǵa 1 mln teńgeniń sertıfıkatyn tabystady. Taldyqorǵandyqtar talantty jastyń ónerine degen súıispenshiligin osylaısha bildirdi. Taldyqorǵandyq kásipkerler men metsenattar atynan Aqshabaı Kerimbekov sóz alyp, tilegin bildirdi.

«Barlyq taldyqorǵandyq senimen maqtanady. Seniń talantyń álemdik deńgeıde moıyndaldy. Bul jerde ustazdaryńnyń da eńbegin atap ótken jón. Endi seni barlyǵy tanıdy. Bul jeńisterińniń bastamasy ǵana dep bilemiz. Alda budan da bıik shyńdardy baǵyndyratynyńa senemiz», - deı kele, kóliktiń kiltin tabystady.

Eske sala ketsek, Rýhııa Baıdúkenova vokalmen 9 jasynan beri aınalysyp keledi. Qazirgi ýaqytta Nur-Sultan qalasyndaǵy Qazaq ulttyq óner mektebiniń «Estradalyq vokal» mamandyǵynyń bilimgeri. Kóptegen án konkýrstarynyń laýreaty. Rýhııanyń daýys dıapazony - bes oktava.