Metsenat-metallýrgter Aqtóbege Shyǵarmashylyq akademııasyn salyp berdi
AQTÓBE. QazAqparat - «QazHrom» TUK» AQ bıznestiń áleýmettik jaýapkershiligi aıasynda Aqtóbege Shyǵarmashylyq akademııasyn salyp berdi. Quny 1,8 mıllıard teńge bolatyn jańa áleýmettik nysan taıaýda paıdalanýǵa beriledi, dep habarlaıdy QazAqparat tilshisi.
Aqtóbe qalasyndaǵy Batys-2 aýdanynda qurylysy aıaqtalǵan Shyǵarmashylyq akademııasynyń ǵımaraty kóp uzamaı paıdalanýǵa beriledi. Qurylys ótken jyly bastaldy. Munda bir myń bala 50-den astam úıirmege qatysa alady. Balalar robot tehnıkasymen, áýe, keme úlgilerin jasaýmen shuǵyldanyp, bı bılep, án shyrqaýdy meńgeredi. Til úırenip, sýret salady.
«Akademııa qurylysy aıaqtalǵan soń shyǵarmashylyqtaryn osynda shyńdaıtyn bolady. Munda zamanaýı observatorııa, planetarıı bolady. Tele, radıo stýdııalarynda mektep oqýshylary jýrnalıstıka, kıno salalarynyń qyr-syryn úırenedi»,- dedi oblystyq bilim basqarmasynyń basshysy Sáýle Ómirbekova.
Aıta keteıik, Aqtóbege kelgen Eýrazııalyq top dırektorlar keńesiniń tóraǵasy Aleksandr Mashkevıch qurylys jumystarynyń sapasymen tanysyp, jobany júzege asyrý úshin qosymsha 580 mln. teńge bólýge ýáde berdi. Sonymen qatar, bıyl bıznestiń áleýmettik jaýapkershiligi aıasynda «Qazhrom» TUK» AQ Hromtaý qalasyna 320 orynǵa arnalǵan balabaqsha salyp bermek.
