Metsenat Aqtóbedegi mýzeıge 635 mln teńge bóldi

AQTÓBE. QazAqparat - Aqtóbe oblysy ákimdigi men belgili metsenat Islambek Saljanov qatar qarjy bólip, óńirdegi mýzeıdiń qurylysyn aıaqtady. Qazir mýzeıde eksponattardy ornalastyrý, zaldardy árleý jumysy júrip jatyr.  QazAqparat tilshisi metsenattyń qoldaýymen júzege asyp jatqan jumys barysymen tanysyp qaıtqan bolatyn.

Elbasy Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamasy aıasynda óńirde «Týǵan jerge taǵzym» aktsııasy ótken bolatyn. Aktsııa aıasynda Qazaqstannyń 100 esimi jobasyna engen metsenat Islambek Saljanov týǵan jerine balabaqsha salyp bergen edi. Keıinnen apatty dep tanylǵan mýzeıdiń jaǵdaıyn eskergen bıznesmen jańa ǵımarat salýǵa kómek berip, mýzeı qurylysyna 635 mıllıon teńge qarjy bóldi. Qazirgi kezde negizgi qurylys jumystary aıaqtalyp, ishki árleý, eksponattardy ornalastyrý jumysy bastalypty.  Bul jumysty «Zaman-Tý» JShS óz mindetine alǵan. Al jergilikti mamandar ǵylymı negizderin baqylap, baǵyt-baǵdar berip, jumystyń tııanaqty oryndalýyna úles qosyp júr.

«Qazirgi kezde mýzeıdegi ishki árleý jumysynyń birinshi kezeńi atqarylyp jatyr. Mýzeıde bes zal bolady. Birinshi qabatta kórme zaly qarastyrylǵan. Eger basqa oblys, aýdandardan mýzeı eksponattary ákelinse, olarǵa arnaıy ornymyz daıyn. Kórme zalynyń janynda tabıǵat zaly ornalasqan. Munda Aqtóbe oblysy, batys óńiriniń flora, faýnasyna qatysty málimetter kórsetiledi. Sonyń ishinde Yrǵyz aýdanyndaǵy Jamanshyń jáne Muǵaljar aýdanyndaǵy Shıli kraterleri bar. Bul zalda erte dáýirdegi janýarlar músini qoıylyp, alyp buǵylardyń súıekteri men mamonttaryń tisi, qabyrǵalary, Yrǵyz-Torǵaı memlekettik tabıǵı rezervatynyń buryshy bektitilgen», - dedi Aqtóbe oblystyq mýzeıi dırektorynyń orynbasary Arman Erjanov.

Tabıǵat zalynyń tóbesi de sátti paıdalanylypty. Onda barlyǵy toǵyz planetanyń maketi de ilýli tur.

«Arheologııa zaly ekinshi qabatta ornalasqan. Onda tas dáýirinen bastap zertteý júrgizilip jatqan kezeńge deıingi eksponattar qoıylady. Qola, erte temir dáýiri, túrkilik kezeń jáne jańa zamanǵa qatysty arheologııalyq dúnıeler bolady. Ári zertteý jumystary kezindegi málimettermen tanysýǵa múmkindik bar. Al «Altyn zal» shaǵyn ári baǵaly. Munda qazba jumystary kezinde tabylǵan baǵaly metall buıymdar, altyn, kúmister qoıylyp, eksponattar kórsetiledi. Kóshpindiler mádenıeti men qazaq halqynyń turmys-tirshiligi, baǵaly metaldardy ıgerýi týraly málimet berilmek»,- dedi Arman Erjanov.

Mýzeıde «Qazaq handyǵy» zaly da bar. Munda 1465-1869 jyldardaǵy ólkeniń damý tarıhy baıandalady. Ereksheligi - «Qalmaqqyrylǵan» pannosy.

«Dala dilmarlary» atty arnaıy sektsııamyz bolady. Sonymen qatar, «Qalmaqqyrylǵan» ataýymen panno (qabyrǵaǵa salynǵan sýret) ornalasady. Bul úshin Temir aýdanyndaǵy Qalmaqqyrǵan jerinen peızaj alynady. Osy jolmen qazaq-qalmaq shaıqasy bolǵan jerdiń túnusqasyn mýzeıden kórý múmkindigi berilmek. Bul zalda Ábilqaıyr hanǵa erekshe oryn berilip, 1710 jyly Araldyń Qaraqumyndaǵy keńes kórinis tabady. Sol jerge Ábilqaıyr han, Bókenbaı batyr, bıler barǵan. Qazaq-jońǵar qarym-qatynasyndaǵy túbegeıli ózgeristi «Han keńesi» arqyly beremiz. Ári munda «Beıbit aýyl» kesindemesi, XVIII-XIX ǵasyrlardaǵy Ult azattyq kóterilis jádigerleri turady. Bıýstter de daıyndalyp jatyr», - dedi Arman Erjanov.