McDonald's óz qyzmetkerlerin jappaı jumystan bosatpaqshy
NЬıÝ-IORK. QazAqparat – Tez tamaqtaný baǵytyndaǵy álemdegi iri meıramhanalar jelisi – McDonald’s birneshe kúnge AQSh-taǵy keńselerin japty. Sebebi óz qyzmetkerlerine jappaı jumystan bosatý júrgiziletinin habarlamaqshy, dep jazady QazAqparat ABC News-ke silteme jasap.
Korporatsııanyń AQSh-taǵy korporatıvtik qyzmetkerleri jáne shet memleketterdegi keıbir qyzmetkerler kompanııadaǵy jumys mártebesi týraly málimet alǵansha úıden jumys isteıdi.
Osy aptada McDonald's óz qyzmetkerlerine kadrlyq sheshimderi týraly jarııalaıdy. Bul buǵan deıin bastalǵan aýqymdy qaıta qurylymdaý naýqanynyń bir bóligi.
Aıta keteıik, AQSh-ta eńbek naryǵy turaqty bolyp otyrsa da, jumystan bosatý kórsetkishi artyp keledi. Ol negizinen pandemııadan keıin kóptegen kompanııalar tym kóp jumysshylardy jaldaǵan tehnologııalyq sektorda baıqalýda. Sońǵy aılarda óz qyzmetshilerin bosatatynyn jóninde IBM, Microsoft, Amazon, Salesforce, Meta, Twitter jáne DoorDash jarııalady.
Osy jyldyń sońyna qaraı jumyssyzdyq deńgeıi 4,6% deıin kóterilýi múmkin dep boljanýda, bul retsessııamen baılanysty.
McDonald's-te 150 myńnan astam qyzmetker korporatıvtik laýazymdarda jumys isteıdi. Olardyń shamamen 70% AQSh-tan tys jerlerde eńbek etýde.
Kompanııa óziniń jahandyq satylymy 2022 jyly shamamen 11%, al AQSh-taǵy satylymy shamamen 6% óskenin habarlady. Meıramhananyń jalpy marjasy 5% artty. Fast-fýd alyby óziniń sońǵy jyldyq esebinde keıbir saýda núktelerin jetkilikti túrde basqarýdaǵy qıyndyqtaryn atap ótken bolatyn.
