McDonald's Qazaqstannan birjola ketetin boldy

ASTANA. QazAqparat - McDonald's jyldam tamaqtaný jelisi Qazaqstandaǵy qyzmetin toqtatyp, basqa ataýmen jumysyn qaıta bastaıdy, dep habarlaıdy QazAqparat.

Food Solutions KZ JShS basqaratyn McDonald's jyldam tamaqtaný brendi jumysyn toqtatady.

«Oǵan sebep - et jetkizýdegi shekteýler. Jaqyn arada jańa ataýmen jyldam tamaqtaný meıramhanalary qaıta ashylady. Ashylý merzimi qosymsha jarııalanady», - dep habarlady McDonald's Qazaqstandaǵy ókildiginiń baspasóz qyzmeti.

Sondaı-aq, kompanııa jańa jeliniń jumysyna qatysty barlyq saýalǵa jaýap beriletinine sendirip otyr.

«Jańadan ashylatyn meıramhanalar jelisi kelýshilerge joǵary sapaly ónimder, baı mázir usynyp, qonaqjaılyq tanytady. Jedel tamaqtaný oryndary jumysyn joǵary standarttarǵa, qundylyqtar men bıznes prıntsıpterine sáıkes jalǵastyrady», - delingen resmı habarlamada.

Buǵan deıin McDonald's jedel taǵamdaný jelisiniń Qazaqstandaǵy jumysyn toqtatatynyn habarlaǵan edik.

Aıta ketsek, elimizde McDonald's brendiniń alǵashqy meıramhanalary 2016 jyly ashyldy.

McDonald's 24 meıramhanasy Almaty, Astana, Atyraý, Aqtóbe, Qostanaı, Qaraǵandyda ashylyp, onda 2000-ǵa jýyq adam jumys istedi.

Foto: mcdonalds.kz