McDonald's bizdiń naryqqa qaıta kelýi múmkin - Serik Jumanǵarın

ASTANA. QazAqparat – McDonald's ónim jetkizýdiń barlyq tizbegine óte joǵary talaptardy qoıyp otyr. Bul týraly Premer-Mınıstrdiń orynbasary – Saýda jáne ıntegratsııa mınıstri Serik Jumanǵarın aıtty, dep habarlaıdy QazAqparat tilshisi.

«Bizdiń naryqtan basqa fastfýdtar ketip jatqan joq, ıaǵnı osynda Burger King, Hardee's sekildi kompanııalar bar. Atap aıtqanda, McDonald's búkil ónim jetkizý tizbegine óte joǵary talaptar qoıyp otyr. Bul turǵyda bizdegi et óńdeý salasynda máseleler bar ekenin kórsetip otyr. Biraq bul tek et óńdeý ónerkásibinde ǵana emes, barlyq aýyl sharýashylyǵyna qatysty. Sondyqtan aýyl sharýashylyǵyn damytýmen qatar, mundaı mańyzdy jobalardy da eskerý kerek», - dedi S. Jumanǵarın Májiliste tilshiler suraǵyna jaýap bere otyryp.

Saýda mınıstrliginiń basshysy McDonald's kompanııasynyń aınalasynda ekojúıe qalyptasqanyn jáne bul joba aýqymdy júıeni qamtyp turǵanyn aıtty.

Onyń aıtýynsha, osy jáne basqa da máselelerdi sheshý úshin negizgi aýyl sharýashylyǵy taýar óndirýshilerimen kezdesý ótkizý josparlanyp otyr.

«Bizde bul máselelerge qatysty tıisti sheshim bar, olardy uzaq merzimdi dep aıta almaımyn. Jalpy túrli organdardyń ózara is-qımylyn qaıta qaraý kerek. Qoldaý quraldary osy protsestiń mańyzdy bóligi bolyp otyr. Men ózim kompanııa basshylyǵymen (McDonald's) pikir almastym. Bul máselemen Aýyl sharýashylyǵy mınıstri de aınalysty. Biz jan-jaqty qoldaý kórsetýge daıyn boldyq. Biraq kompanııanyń ózi muny qalamady, óıtkeni repýtatsııalyq táýekelder boldy. Degenmen McDonald's birjola bizden ketti dep aıta almaımyn. Qazaqtan naryǵy qalaı bolǵanda da tartymdy bolady, biz qandaı da bir sanktsııaǵa túsken el emespiz», - dedi mınıstr.