McDonald's Japonııada adamdardy taǵy da jıirkendirdi
ASTANA. QazAqparat - Japonııanyń Aıdzý-Vakamatsý qalasyndaǵy (Fýkýsıma prefektýrasy) jyldam tamaqtaný júıesi meıramhanalarynyń birinde daıyndalǵan chızbýrgerdiń ishinen metall bóligi tabyldy. Bul týraly kompanııanyń Japonııadaǵy bólimi basshylyǵynyń ókilderi habarlady, dep jazady TASS.
Ótkizilgen tergeý qorytyndylary boıynsha, kompanııa tabylǵan uzyndyǵy shamamen 5 mm metall synyǵy meıramhanada býrgerler úshin kotlet qýyratyn buıymnyń bólshegi boldy degen tujyrymǵa keldi.
Bul sońǵy ýaqytta Japonııadaǵy McDonald's kompanııasyna qatysty birinshi janjal emes. Ótken aptada kompanııa 2014 jyldyń jazynda Osaka qalasyndaǵy jyldam tamaqtaný júıesi meıramhanalarynyń birindegi frı kartobynyń ishinen adamnyń tisi shyqqanyn málimdedi.
Buǵan deıin McDonald's-tiń Mısava qalasyndaǵy (Aomorı prefektýrasy) meıramhanalarynda ázirlengen taýyq naggetsteriniń ishinen plastmassa bólikteri tabylǵan eki oqıǵa týraly belgili. Bul oqıǵadan keıin kompanııa tekseris júrgize bastady. Keıinnen bul naggetster kompanııanyń Taılandtaǵy zaýyttarynyń birinde ázirlengeni anyqtalǵan.
