Mbappe sotta jeńiske jetti: PSJ oǵan 61 mıllıon eýro tóleıdi

ASTANA. KAZINFORM — Eńbek sotynyń sheshimine sáıkes, PSJ tez arada Kılıan Mbappaǵa 61 mıllıon eýro tóleýi kerek, dep habarlaıdy RMC SPORT.

Sportshy PSJ fýtbol klýbymen byltyr qosh aıtysqan. Ol kelisimshart merzimi aıaqtalmaı turyp tólenbegen úsh aılyq jalaqysy, bonýstary men aqyly eńbek demalys úshin tólemin talap etken. Endi fýtbol klýb burynǵy oıynshysyna tolyq somany tez arada tóleýi qajet. 

— Biz 18 aıdan beri qoldan kelgenniń bárin jasadyq. Bul sheshim biz úshin jeńis. Munyń bári jeke másele emes. Bul jaı ǵana prıntsıp. Siz óz jumysyńyz úshin aqy alasyz, sol sekildi, — dedi oıynshynyń advokattary.  

Sheshim shyqqannan keıin kóp uzamaı PSJ málimdeme jarııalady.

— «Parı Sen-Jermen» Parıj ónerkásiptik trıbýnalynyń sheshimin moıyndaıdy. Qaıta shaǵymdaný quqyǵyn saqtaı otyryp, sheshimdi oryndaýdy moınyna alady. Parı Sen-Jermen árqashan adal áreket etti jáne bul isin jalǵastyra beredi. Endi klýb oıynshyǵa mansabynyń sońyna deıin jaqsylyq tileıdi, — delingen málimdemede.

Buǵan deıin Mbappe jańa maýsymnan bastap «Real» sapynda jańa nómirmen oınaıtyny týraly jazǵan edik.