Mbappe ÁCh keıin alǵashqy matchynda óz komandasyn jeńiske jetkizdi

ASTANA. QazAqparat – Fýtboldan Frantsııa chempıonatynyń 16-týrynda «PSJ» Parıjdegi «Park de Prens» stadıonynda «Strasbýrg» komandasyn qabyldady, dep habarlaıdy QazAqparat tilshisi.

Bul Qatarda ótken álem chempıonatynan keıin sol birinshiliktiń surmergeni, Frantsııa quramasy men «PSJ» klýbynyń shabýylshysy Kılıan Mbappeniń alǵashqy matchy edi.

Alań ıelerinen qorǵaýshy Markınos 14-mınýtta Neımardyń pasynan keıin óz komandasyn alǵa shyǵardy. Áıtse de ekinshi kezeńde bári ózgerip ketti. 51-mınýtta Markınos óz qaqpasyna gol soǵyp aldy. Al 63-mınýtta ekinshi eskertýin alǵan Neımar alańnan qýyldy. Degenmen 90+6-mınýtta K.Mbappe 11 metrlik penaltıdi múltiksiz oryndap, «PSJ» klýbyna jeńis áperdi.

Frantsııa chempıonatynda «PSJ» 44 upaımen jekedara kósh bastap keledi. Kelesi týrda parıjdikter syrt alańda «Lanspen» oınaıdy. Argentına quramasynyń kapıtany ári shabýylshysy Lıonel Messı komandaǵa ázirge qosyla qoıǵan joq.

K.Mbappe álem chempıonatynyń fınalyndaǵy jeńilis qansha aýyr tıse de, «PSJ» klýbyna tez oralǵanyn, maqsaty – barlyq kýbokti el astanasyna jetkizý ekendigin aıtty.

«PSJ» Chempıondar lıgasynda da jarysty jalǵastyrýda. Aldaǵy jyly parıjdikter 1/8 fınalda Eýropadaǵy eń myqty klýbtardyń biri – «Bavarııamen» (Germanııa) kezdesedi.

Eske sala keteıik, budan buryn Mbappeniń álem chempıonatynan keıin eń qymbat oıynshy atanǵanyn jazǵan bolatynbyz.

Ashyq kózderden alynǵan foto