Májilistiń qorytyndy jalpy otyrysy: Erlan Qoshanov palata jumysyna baǵa berdi
ASTANA. KAZINFORM — Májilis tóraǵasy Erlan Qoshanov VIII saılanǵan QR Parlamentiniń tórtinshi sessııasyndaǵy palatanyń jumysyn qorytyndylady.
- Búgin Parlament Májilisiniń 8-shi saılanymdaǵy qorytyndy plenarlyq otyrysyn ótkizip otyrmyz. Jalpy, Parlament jumysyn 30 maýsym kúni Memleket basshysy qorytyndylaıdy. Sondyqtan qalyptasqan dástúr boıynsha, búgin men tek Májilistiń osy sessııadaǵy qyzmetine ǵana qysqasha toqtalyp ótsem deımin. Sessııanyń ashylýynda Memleket basshysy Qasym-Jomart Toqaev aldaǵy jyldardaǵy elimizdiń strategııalyq damý baǵdaryn aıqyndap berdi. Memleketimizde buryn-sońdy bolmaǵan aýqymdy ózgerister men túbegeıli jańǵyrý joly ásirese, zań shyǵarý protsesine tyń serpin ákeldi. Osy sessııa Qazaqstan parlamentarızminiń jańa tarıhyndaǵy eń mańyzdy kezeńniń birine aınaldy deýge bolady. Prezıdentimiz atap ótkendeı, 1 shildede Qazaqstan jańa dáýirge qadam basady. Bul – tutas ultymyzdyń, Memleket basshysynyń uly jetistigi. Al depýtattar sol tarıhı betburystyń zamanaýı zańnamalyq negizin qalaýǵa atsalysty, - dedi E.Qoshanov Májilistiń jalpy otyrysynda.
Osy oraıda ol Parlament jańa Konstıtýtsııany iske asyrý úshin birqatar konstıtýtsııalyq zań qabyldaǵanyn eske saldy. «Prezıdent», «Astananyń mártebesi», «Ákimshilik-aýmaqtyq qurylys» týraly zańdar jańaryp, «Quryltaı jáne onyń depýtattarynyń mártebesi», «Halyq Keńesi» týraly múldem jańa zańdar qabyldandy. Osylaısha, Ata zańnyń kúshine enýi úshin barlyq jumys sapaly ári ýaqytyly atqaryldy. Sonymen qatar depýtattar «Jańa Konstıtýtsııanyń qabyldanýyna baılanysty raqymshylyq jasaý týraly» zań qabyldady. Elimizde qylmystyq raqymshylyqpen birge, alǵash ret ákimshilik raqymshylyq jasaldy.
- Memleket basshysy byltyrǵy Joldaýynda Qazaqstandy úsh jyl ishinde tsıfrly memleketke aınaldyrý jóninde aýqymdy mindet qoıdy. Bul baǵytta jańa «Tsıfrlyq kodeks» pen «Jasandy ıntellekt týraly» zań qabyldandy. Atalǵan eki mańyzdy qujat ta depýtattardyń bastamasymen ázirlendi. Ol elimizdiń tsıfrlyq damýyn jańa deńgeıge kóterýge jol ashady. Qazaqstan álemde mundaı zań qabyldaǵan alǵashqy elderdiń qatarynda. Al zań men tártip salasyna toqtalsaq, bul baǵytta da kóp sharýa atqaryldy. Qylmystyq kodeks pen Qylmystyq-protsestik kodekske mańyzdy ózgerister engizildi. Sóıtip, medıtsına qyzmetkerlerin, jedel járdem júrgizýshilerin qorǵaý úshin olarǵa jasalǵan zorlyq-zombylyqqa qylmystyq jaýapkershilik qarastyryldy.S onymen qatar, biz «Quqyq buzýshylyq profılaktıkasy týraly» zańdy da qabyldadyq. Jalpy, sońǵy ýaqytta qoǵamda zań men tártipke degen suranys artyp, bul prıntsıp berik ornyǵyp keledi dep aıta alamyz. Qabyldanǵan zańdardyń bári osy qaǵıdatty nyǵaıtýǵa baǵyttalǵan, - dedi Májilis tóraǵasy.
Jalpy, tórtinshi sessııada 40 jalpy otyrys ótip, 334 másele qaraldy. 190 zań jobasy Palata qaraýynda boldy. Sonyń árbir úshinshi zań jobasy depýtattardyń bastamasymen ázirlendi. Memleket basshysy 110 zańǵa qol qoıdy.
- Budan bólek, depýtattyq saýal sekildi mańyzdy tetikter de belsendi túrde júzege asty. Memlekettik organdarǵa 419 depýtattyq saýal joldanyp, azamattardy tolǵandyryp júrgen eń ózekti máseleler kóterildi. Sonymen birge, biz qalyptasqan dástúr boıynsha óńirlerdegi kezdesýler barysynda saılaýshylar kótergen túıtkilderdi sheshý joldary jóninde Úkimettiń jaýabyn tyńdadyq. Bıyldyń ózinde depýtattar 500 eldi mekendi aralap, 1200 kezdesý ótkizdi. Jurtshylyqty qabyldaý bólmesine 2327 adam júginip, depýtattardyń qabyldaýynda boldy. Máseleniń basym bóligi sol jerde sheshimin tapty... Jańa atap ótkenimdeı, 2026 jyl el shejiresine altyn árippen jazylady. Osy tarıhı oqıǵalardyń bel ortasynda ózderińiz de júrdińizder. Ár fraktsııa, bir mandatty okrýgten saılanǵan ár depýtat «Ádiletti jáne progressıvti Qazaqstannyń Halyq Konstıtýtsııasy úshin!» jalpyulttyq koalıtsııasy jumysyna zor úles qosty, - dedi Erlan Qoshanov.
Budan buryn habarlanǵandaı, búgin elordada Parlament palatalarynyń birlesken otyrysynda QR Úkimetiniń jáne QR Joǵary aýdıtorlyq palatasynyń 2025 jylǵy respýblıkalyq bıýdjettiń atqarylýy týraly esebi bekitildi.
