Májilistiń Ádiletti Qazaqstan qaǵıdattary boıynsha rezolıýtsııasynyń mańyzy nede

ASTANA. KAZINFORM – Depýtat Elnur Beısenbaev búgin Parlament Májilisiniń jalpy otyrysynda qabyldanǵan elimizdiń barlyq progressıvti qoǵamdyq-saıası kúshterin Memleket basshysynyń tóńireginde toptasýǵa jáne Ádiletti Qazaqstan qurý qaǵıdattaryna negizdelgen rezolıýtsııaǵa qatysty pikir aıtty.

– Bul qarar – kollegııaly túrde qabyldanǵan qujat. Onyń basty maqsaty – Memleket basshysynyń úsh jylda jasaǵan negizgi reformalary aıasyndaǵy qabyldanǵan formýlalar men qujattar, iske asyp jatqan zańdar boıynsha Májilistiń basty pozıtsııasyn anyqtaıdy. Osy oraıda barlyq ustanymdardy búgin qabyldanǵan qararda kórsettik. Onyń ishinde myqty ınstıtýttar, ıaǵnı Parlament pen Úkimettiń róli, sondaı-aq ádilettilik ustanymy, ashyqtyq pen erkindik sııaqty negizgi qaǵıdattarǵa jaýap berilgen, - dedi E.Beısenbaev Májilistiń jalpy otyrysynan keıin tilshiler suraǵyna jaýap bere otyryp.

Budan buryn habarlanǵandaı, Májilis Ádiletti Qazaqstan qurý qaǵıdattaryna negizdelgen rezolıýtsııany qabyldady. 

– Qazaqstan úsh jyl buryn jańǵyrý men ádiletti qoǵam qurý jolyn tańdady. Prezıdent kópshiliktiń ózgeristerge degen suranysyn iske asyra otyryp, memleketti nyǵaıtýǵa jáne azamattardyń quqyqtary men múmkindikterin keńeıtýge baǵyttalǵan aýqymdy saıası jańǵyrý baǵdarlamasyna bastamashylyq etti. Búgin biz sol transformatsııany qorytyndylap otyrmyz: memleket kúshtirek, halyq belsendirek bola tústi. Qoǵam ómiriniń barlyq salasy men saıası mádenıet túbirimen ózgerdi. Prezıdenttiń baıypty baǵdary arqasynda reformalar myzǵymas sıpatqa ıe bolyp, ádilettilik, ashyqtyq jáne jaýapkershilik qaǵıdattary el damýynyń jańa modelin qalyptastyrdy... Qazaqstan – adal eńbek tabysqa jeteleıtin, zań tulǵalar men mártebeden joǵary turatyn, al bolashaǵy halyqpen birge qurylatyn el. Májilis Prezıdenttiń baǵytyna qoldaý bildirip, basty maqsatymyz – Ádiletti Qazaqstan qurý úshin barlyq azamatty birigýge shaqyrady, - delingen qarar mátininde.