Májiliste jasandy ıntellekt kómegimen jasalǵan týyndyny «JI» tańbasymen jarııalaý máselesi pysyqtalyp jatyr

ASTANA. KAZINFORM – Májilis depýtaty Únzıla Shapaq jasandy ıntellekt kómegimen jasalǵan týyndyny «JI» tańbasymen jarııalaý týraly usynystarǵa pikir bildirdi.

Májilis jasandy ıntellekt týraly úsh birdeı zańnyń jobasyn birinshi oqylymda maquldady. Qujattardy ázirlep jatqan jumys tobynyń quramynda depýtat Únzıla Shapaq ta bar. Palatanyń jalpy otyrysynan keıin ol jýrnalısterge atalǵan qujattardyń jańashyldyǵyn túsindirgen.

- Qazir jasandy ıntellekt kómegimen sýret salynady, óleń men maqala jazylady. Zań arqyly osyndaı avtorlardy týyndysyna «JI» tańbasyn qoıýǵa mindetteısizder me? - dep surady jýrnalıst.

Depýtat Únzıla Shapaq bul másele «Jasandy ıntellekt» týraly zańnyń jobasyn ekinshi oqylymǵa daıyndaý kezinde pysyqtalmaq.

- Jalpy jasandy ıntellekt kómegi adam paıdalanatyn bolsa, týyndyny ázirleý úlesin esepteıtin jaǵdaı kerek. Mysaly men bir maqala jazdym deıik. Jazyp bolǵannan keıin onyń grammatıkasyn, emlesin, stılıstıkasyn jasandy ıntellektige teksertýim múmkin. Mundaı jaǵdaıda negizgi jumysty men istegen bolyp eseptelemin. Al jasandy ıntellekt tek korrektordyń qyzmetin atqarǵan. Mundaı kezde týyndy avtory men bolyp eseptelemin. Al endi týyndyny tolyqqandy jasandy ıntellekt jasasa, ony adam óz atynan jarııalasa, ol zańsyz bolyp eseptelý kerek, - deıdi ol.

Onyń sózinshe keıbir elder jasandy ıntellekt kómegimen jasalǵan týyndyǵa adamnyń qansha úles qosqanyn ólsheý tásilderin ázirlep jatyr. Jumys toby mundaı nusqany da pysyqtap jatqan kórinedi.

- Jasandy ıntellektini paıdalanýdyń paıyzben ólsheıtin krıterııleri bolady. Al «JI» tańbasyn qoıýǵa mindetteý máselesin dál qazir aıta almaımyn. Bul tek jumys tobynda talqylanyp jatqan másele. Zań jobasy daıyn bolǵan kezde naqtylanady, - dedi Únzıla Shapaq.

Aıta keteıik, Májilis jasandy ıntellekt týraly úsh zańnyń jobasyn maquldady.