Májiliste jańa depýtat ant berdi
ASTANA. KAZINFORM – Parlament Májilisiniń jalpy otyrysynda Oqý-aǵartý mınıstri qyzmetine aýysqan Juldyz Súleımenovanyń ornyna kelgen jańa depýtat ant berdi.
Buǵan deıin AMANAT partııasynyń saıası keńes bıýrosy Májilistegi partııalyq tizim boıynsha bos mandatty Prezıdent jastar kadrlyq rezerviniń múshesi Ábýtálip Mútálige berý týraly qaýly qabyldaǵany habarlanǵan.
– Qazaqstan halqyna adal qyzmet etýge, Qazaqstannyń tutastyǵy men táýelsizdigin nyǵaıtýǵa, onyń Konstıtýtsııasy men zańdaryna qatań baǵynýǵa, depýtattyń ózime júktelgen mártebeli mindetterin adal atqarýǵa ant etemin, – dedi Ábýtálip Mútáli.
Partııa taratqan málimetke súıensek, AMANAT fraktsııasynyń jańa depýtaty «Bolashaq» baǵdarlamasynyń túlegi, buǵan deıin tsıfrlyq tehnologııalar men jasandy ıntellekt baǵytynda eńbek etip kelgen.
Sondaı-aq, Ábýtálip Mútáli Májilistiń Ekonomıkalyq reforma jáne óńirlik damý komıtetiniń quramyna saılandy.
Aıta keteıik, búgin Májiliste zań men tártip ústemdik etetin qoǵam qurýdy kózdeıtin zań jobasy talqylanyp jatyr.