Májiliste ıAndeks, InDriver sııaqty platformalarǵa jańa talap qoıý usynyldy

ASTANA. KAZINFORM – Májiliste taksı qyzmetin ózin-ózi retteý uıymǵa múshelikke etý máselelerine arnalǵan zań jobasy birinshi oqylymda talqylanyp jatyr.

Depýtat Erlan Stambekov zań jobasyn tanystyrǵan Kólik mınıstri Marat Qarabaevtan atalmysh zańnama ózgeristeri iri taksı agregatorlarynyń qyzmetine qalaı áser etetinin surady. «Qazaqstanda «ıAndeks», InDriver, «Maksım», Aparu, Tapi Taxi sııaqty taksıge tapsyrys berýge arnalǵan qosymshalar jumys isteıdi. Osyndaı qosymsha ıeleriniń ózin-ózi retteıtin uıymdarǵa mindetti múshelik týraly talapty oryndaýyn qalaı qamtamasyz etesizder?» - dep surady ol.

Kólik mınıstriniń aıtýynsha, atalǵan uıymdarǵa ózin-ózi retteıtin uıymǵa múshe bolý mindetti bolady. Ol mindetti oryndalmasa qyzmet etý quqyǵynan aıyrylady.

«Biz usynyp otyrǵan zańda eki másele qarastyrylǵan. Birinshisi mindetti túrde, ekinshisi erikti túrde múshe bolýdy usynady. Siz aıtyp otyrǵan alpaýyt ınternet agregattary osyndaı ózin-ózi retteý uıymyna múshe bolýǵa mindetteledi. Eger ol ózin-ózi retteý uıymdaryna múshe bolmasa, qyzmeti zańsyz dep tanylady. Al zańsyz qyzmet atqarǵan uıymnyń jumysyna tyıym salatyn normalar jalpy zańnamada bar. Sondyqtan osyndaı úlken ınternet platformalar óz qyzmetin saqtap qalý úshin mindetti túrde ózin-ózi retteıtin uıymǵa múshe bolady. ıAǵnı, olar buǵan múddeli bolady», - dedi Marat Qarabaev.

Sondaı-aq, ol jeke menshik kóligimen taksı qyzmetin atqaratyn qarapaıym adamdarǵa óz-ózin retteýshi uıymǵa múshe bolý mindetti talap bolmaıtynyn, erikti túrde usynylatynyn aıtty.