Májiliste usynylǵan zań jobalarynyń basym bóligin AMANAT partııasy fraktsııasy ázirledi
ASTANA. KAZINFORM – Májilistegi AMANAT partııasy fraktsııasynyń músheleri osy jyly atqarylǵan jumysty qorytyndylap, aldaǵy ýaqytta qolǵa alynatyn negizgi maqsat-mindetterdi talqylady.
Depýtattar Memleket basshysynyń tapsyrmalary, sondaı-aq Prezıdent pen partııanyń saılaýaldy baǵdarlamalary sapaly ári ýaqtyly oryndalyp jatqanyn erekshe atap ótti. Sonymen qatar zań shyǵarý qyzmetiniń nátıjeleri saralanyp, aldaǵy kezeńdegi negizgi mindetter aıqyndaldy jáne saılaýshylarmen kezdesý úshin depýtattardyń óńirlik saparlaryna daıyndyǵy pysyqtaldy.
Májilis spıkeri, AMANAT partııasynyń tóraǵasy Erlan Qoshanovtyń aıtýynsha, qazir elimizde tarıhı ózgerister júrip jatyr jáne partııa osy úderisterdiń alǵy shebinde tur. Bıyl Prezıdenttiń qatysýymen alǵash ret aýyl ákimderiniń dıalog-platformasy ótkizilip, onda el damýyna qatysty mańyzdy máseleler talqylandy. Bul alań — partııa áleýetiniń jáne el basshylyǵynyń oǵan degen joǵary seniminiń aıqyn kórsetkishi.
— Prezıdent saıasaty — partııa jumysynyń negizgi basymdyǵy. Sondyqtan biz Memleket basshysynyń barlyq Joldaýlaryn, reformalary men bastamalaryn qoldaımyz. Óıtkeni, olardyń artynda memlekettik múdde, azamattardyń ál-aýqaty jáne elimizdiń turaqty damýy tur. Partııa óz jumysynda osyny basshylyqqa alady. Osy shaqyrylymda depýtattar bastamashylyq etken 98 zańnyń 88-in partııamyzdyń músheleri ázirledi. Bul — Májilistegi bastamashyl zańdardyń 90 paıyzy AMANAT fraktsııasyna tıesili degen sóz. Osy joǵary qarqyndy aldaǵy ýaqytta da saqtaý qajet, — dedi Erlan Qoshanov.
Sonymen qatar partııa Tóraǵasy zań shyǵarý protsesi barysynda fraktsııa músheleri 7100-den astam ózgertý men túzetý engizgenin atap ótti. Olar 728 depýtattyq saýal joldady. Osy shaqyrylymda Májilis qabyrǵasynda joldanǵan depýtattyq saýaldardyń jartysynan kóbisi «AMANAT» fraktsııasynyń múshelerine tıesili. Bul saýaldardyń barlyǵy azamattardy tolǵandyrǵan ózekti máselelerdi sheshýge baǵyttalǵan.
Erlan Qoshanov «Qaryzsyz qoǵam», «Aýyl amanaty», «Jer amanaty» jáne «Tsıfrlyq qoǵam» partııalyq jobalaryna erekshe nazar aýdardy. Búginde osy jobalar belsendi túrde júzege asyrylyp, mıllıondaǵan azamatqa naqty qoldaý kórsetip otyr. Depýtattar bul jobalardy júıeli júzege asyrý isine belsendi aralasyp, olardyń máni men mańyzyn halyqqa keńinen túsindirýge tıis.
Sondaı-aq Májilis Spıkeri aýyl ákimderiniń dıalog-platformasynda Prezıdent aıqyndap bergen negizdi mindetterdi júzege asyrý jumysyn jedeldetýdi tapsyrdy. Atap aıtqanda, aýdan ákimderin saılaý jáne IV deńgeıli bıýdjetterdi jetildirý boıynsha naqty usynystar ázirleý qajet ekeni atap ótildi. Bul máseleler «AMANAT» partııasynyń Óńirlik damý jónindegi respýblıkalyq keńesinde ashyq ári jan-jaqty qaralýǵa tıis. Sondaı-aq fraktsııa shalǵaı aýdandar men shekaralyq aýmaqtardy damytýǵa arnalǵan zańnyń tezdetip qabyldanýyn qamtamasyz etýi qajet. Bul osy aýdandardyń turaqty ári keshendi áleýmettik-ekonomıkalyq damýyna baǵyttalǵan júıeli qujat bolýy kerek.
Jıyn sońynda partııa tóraǵasy parlamentshilerdiń óńirlerge sapary aldynda depýtattarǵa birqatar mindet júktedi. Kelesi jyly qańtar aıynda saılaýshylarmen kezdesýler bastalady. Sapar barysynda depýtattar óndiristik jáne áleýmettik nysandardy aralap, eńbek ujymdarymen júzdesip, azamattardy jeke qabyldaıdy. Erlan Qoshanov bul kezdesýler jergilikti máselelerdi ashyq talqylaýǵa jáne qabyldanǵan zańdardyń mánin halyqqa túsindirýge baǵyttalǵan mazmundy dıalog formatynda ótýge tıis ekenin atap ótti.