Májiliste mashına jasaý salasyn damytýǵa baǵyttalǵan zań jobasy ekinshi oqylymda qaraldy
ASTANA.KAZINFORM - Májilis otyrysynda Qazaqstan Respýblıkasynyń «Mashına jasaý salasyn damytý máseleleri boıynsha keıbir zańnamalyq aktilerine ózgerister men tolyqtyrýlar engizý týraly» zań jobasy ekinshi oqylymda talqylandy.
Baıandamamen Ekonomıkalyq reforma jáne óńirlik damý komıtetiniń múshesi Muqash Eskendirov sóz sóıledi. Onyń aıtýynsha, qujat 2026 jylǵy 21 mamyrda birinshi oqylymda maquldanǵan.
Zań jobasynda birqatar mańyzdy normalar kózdelgen. Atap aıtqanda, shaǵyn jáne orta bıznes sýbektileriniń qatysýymen óndiristik kooperatsııany damytýǵa baǵyttalǵan ónerkásiptik klasterler ınstıtýtyn engizý usynylady.
Sondaı-aq arnaıy ekonomıkalyq aımaqtardyń tıimdiligin arttyrý úshin ónerkásiptik-ınnovatsııalyq jobalardy iske asyrý barysynda qazaqstandyq taýarlar men otandyq shıkizatty paıdalaný boıynsha qarsy mindettemeler engizý qarastyrylǵan.
Qujatta qara jáne tústi metall synyqtary men qaldyqtarynyń aınalymyn retteý, sondaı-aq ishki suranysty qamtamasyz etetin óndiristik qýattar bolǵan jaǵdaıda jańa jobalardy memlekettik qoldaýdy shekteýge múmkindik beretin óndiristik qýattar teńgerimin baǵalaý tetigin engizý kózdelgen.
Budan bólek, kólik quraldarynyń komponentterin ónerkásiptik qurastyrý týraly kelisimder jasasý sharttaryn belgileý usynylady.
Depýtattyń málimetinshe, zań jobasy aıasynda qoldanystaǵy zańnamany jetildirý, redaktsııalyq túzetýler engizý jáne zań tehnıkasy talaptaryn saqtaý boıynsha da birqatar ózgeris qarastyrylǵan.
- Zań jobasy 15 zańnamalyq aktige, onyń ishinde 2 kodeks pen 13 zańǵa ózgerister men tolyqtyrýlar engizýdi kózdeıdi, – dedi Muqash Eskendirov.
Sonymen qatar ol qujattyń jan-jaqty pysyqtalǵanyn jetkizdi. Atap aıtqanda, zań jobasy jumys tobynyń 13 otyrysynda jáne komıtettiń eki keńeıtilgen otyrysynda qaralǵan. Jalpy 374 túzetý engizilip, qorytyndy salystyrma keste 237 pozıtsııadan quralǵan. Qabyldanbaǵan usynystar joq.
Buǵan deıin mashına jasaý salasyndaǵy negizgi basymdyqtyń biri – maman daıarlaý ekenin jazǵanbyz.
