Májiliste kolledjder júıesin jańǵyrtýǵa arnalǵan zań jobasy tanystyryldy

Zań jobasy boıynsha Senat depýtaty Amangeldi Esbaı baıandama jasady. Ol Memleket basshysy Qasym-Jomart Toqaev Joldaýynda eńbek adamdary men jumysshy mamandyqtarynyń mańyzyna erekshe nazar aýdarǵanyn aıtty. Sondaı-aq 2025 jyldyń Jumysshy mamandyqtar jyly bolyp jarııalanýy sala damýyna tyń serpin bergenin atap ótti.

Senatordyń aıtýynsha, qazirgi ekonomıka dıplomy bar mamandarmen ǵana shektelmeıdi. Eńbek naryǵynda zamanaýı tehnologııany meńgergen, tájirıbelik mashyǵy qalyptasqan bilikti tehnıkalyq kadrlarǵa suranys artyp keledi.

— Búginde ekonomıkaǵa tek dıplom ıeleri emes, óndiriste naqty jumys isteı alatyn, zamanaýı tehnologııany meńgergen mamandar qajet. Mundaı kadrlar turaqty damýdyń tiregine aınalady. Sondyqtan tehnıkalyq jáne kásiptik bilim berý júıesin damytý — memlekettiń strategııalyq basymdyǵy, — dedi Amangeldi Esbaı.

Onyń sózinshe, zań jobasy tehnıkalyq jáne kásiptik bilim berý júıesin damytýǵa, otandyq óndiristi qoldaýǵa jáne jastardyń múmkindigin keńeıtýge baǵyttalǵan.

Qujatta kásibı biliktilikti halyqaralyq deńgeıde taný tetikterin jetildirý, salany tsıfrlandyrý jáne ulttyq biliktilik júıesindegi ókilettikterdi qaıta qaraý kózdelgen.

Sonymen qatar kóshi-qon saıasatyna da erekshe mán berilgen. Zań jobasynda eńbek kóshi-qony tetikterin júıelep, ony jeke zań arqyly retteý qarastyrylǵan. Budan bólek, qonys aýdarý baǵdarlamasyna qatysýshylardy qoldaý sharalaryn keńeıtý usynylǵan.

Sondaı-aq jekemenshik jumyspen qamtý agenttikteriniń qyzmetine memlekettik baqylaýdy kúsheıtý jáne tólemder men qoldaý sharalarynyń ashyqtyǵyn tsıfrlyq júıeler arqyly arttyrý kózdelip otyr.

Amangeldi Esbaıdyń aıtýynsha, usynylyp otyrǵan ózgeristerdi iske asyrý memlekettik bıýdjetten qosymsha shyǵyndy talap etpeıdi.

Aıta keteıik, buǵan deıin 2035 jylǵa qaraı Qazaqstanda 562 kásip nemese eńbek naryǵynyń 44%-y (shamamen 4 mln adam) jasandy ıntellektiniń yqpalymen ózgerýi múmkin ekenin jazdyq.