Májiliste kókparǵa arnalǵan qaýipsizdik standartyn zańnamalyq deńgeıde bekitý usynyldy
ASTANA.KAZINFORM – Qaýipsizdik talabyn saqtamaı nemese ruqsatsyz kókpar ótkizgen uıymdastyrýshynyń jaýapkershiligin kúsheıtý qajet. Bul jóninde Parlament Májilisinde depýtat Bolat Kerimbek QR Premer-Mınıstriniń orynbasary – Mádenıet jáne aqparat mınıstri Aıda Balaevaǵa joldaǵan depýtattyq saýalynda málimdedi.
Onyń sózinshe, ultymyzdyń ǵasyrlar boıy urpaqtan-urpaqqa jalǵasyp kele jatqan kókpar oıyny – ulttyq rýh pen bolmystyń, ulttyq sananyń ajyramas kody. Búginde jappaı kókpardyń aýqymy keńeıip, halyq qyzyǵýshylyǵy joǵary mádenı-sporttyq is-sharanyń birine aınaldy.
– Ásirese, Jambyl, Túrkistan, Qyzylorda jáne Almaty oblysynda jappaı kókpar keń taralǵan. Osy óńirlerde ótken jyldyń qarasha-jeltoqsan aıynda 130-ǵa jýyq, bıylǵy naýryz-sáýirde 80-nen astam resmı oıyn tirkeldi. Bul – esepke alynǵan jarystar qana. Budan bólek, as pen toı aıasynda ótkizilgen baqylaýsyz kókpar da az emes. 2025 jyldan bastap bul salany retteý baǵytynda birqatar shara qabyldanyp, «Jappaı kókpar» federatsııasynyń qyzmeti jandandy. Alaıda is júzinde ortaq ereje saqtalmaı keledi. Kóp jaǵdaıda oıyn barysynda kúsh kórsetý aldyńǵy orynǵa shyǵyp, federatsııanyń úılestirý jumysynyń álsizdigin baıqatady, – dedi Bolat Kerimbek.
Sonymen qatar qatysýshynyń jas ereksheligi eskerilmeıdi, olardyń sany da shektelmeıdi. Keı jaǵdaıda 400-500 adamnan bastap 1500-2000 kókparshyǵa deıin qatysatyn oıyn ótedi. Mundaı jaǵdaıda sporttyq tártip pen qaýipsizdik talabyn saqtaý qıyn.
Kókpar jylqysyn baptaý men paıdalaný tártibi de naqty rettelmegen. Atqa kúsh qoldaný, dopıng paıdalaný, ádeıi soqtyǵysý deregi jıi kezdesedi.
Sońǵy oqıǵalar jappaı kókpar ótkizý kezinde qaýipsizdik, uıymdastyrý jáne baqylaý máselesiniń ózektiligin kórsetti. Qatysýshylar densaýlyǵyna qaýip tónýi men jylqynyń jaraqat alýy yqtımal bolǵanyna qaramastan, medıtsınalyq kómek kórsetý tártibi tolyq rettelmegen.
– 2026 jylǵy 26 mamyrda Aqmola oblysy Tselınograd aýdanynda kókpar jattyǵýy kezinde 14 jastaǵy jasóspirim attan qulap, aýyr jaraqat alyp, kóz jumdy. Aldyn ala málimet boıynsha, shara jergilikti turǵyn bastamasymen resmı kelisimsiz uıymdastyrylǵan, qatysýshy sport sektsııasynda tirkelmegen, qaýipsizdik pen jaýapkershilik máselesi ashyq qalǵan. Qazirgi ýaqytta osy fakti boıynsha tergeý júrgizilip jatyr. Bul jaǵdaı uıymdastyrýshy jaýapkershiligin naqtylaýdyń, medıtsınalyq jáne veterınarlyq súıemeldeýdiń biryńǵaı standartyn engizýdiń, ruqsatsyz ótkiziletin oıynǵa baqylaýdy kúsheıtýdiń mańyzyn kórsetedi, – dedi depýtat.
Osyǵan baılanysty Bolat Kerimbek Úkimetten Jappaı kókparǵa arnalǵan qaýipsizdik standartyn zańnamalyq deńgeıde bekitip, qatysýshy sanyna, medıtsınalyq jáne veterınarlyq baqylaýǵa mindetti talap engizýdi surady.
Sonymen qatar Týrızm jáne sport mınıstrligi, Aýyl sharýashylyǵy mınıstrligi, Іshki ister mınıstrligi, Densaýlyq saqtaý mınıstrligi, jergilikti atqarýshy organ jáne federatsııa arasyndaǵy quzyretti naqtylaýdy, qaýipsizdik talabyn saqtamaı nemese ruqsatsyz kókpar ótkizgen uıymdastyrýshynyń jaýapkershiligin kúsheıtýdi usyndy.
Aıta keteıik, buǵan deıin kókpar oıyny kezinde Aqmola oblysynda jasóspirim qaza tapqanyn jazǵanbyz.
