Májiliste Qarataı Turysovtyń 90 jyldyǵyna arnalǵan jıyn ótti
ASTANA. KAZINFORM – Búgin Parlament Májilisinde kórnekti memleket jáne qoǵam qaıratkeri Qarataı Turysovtyń 90 jyldyǵyna arnalǵan jıyn ótti. Taǵylymdy kezdesýge elimizge eńbegi sińgen qaıratker-tulǵalar, Qarataı Turysulymen úzeńgiles, áriptes bolǵan azamattar, aıaýly jary men jaqyndary, Senat pen Májilis depýtattary jáne Úkimet músheleri qatysty.
Májilis spıkeriniń orynbasary Danııa Espaeva mereıtoıǵa oraı Memleket basshysy Qasym-Jomart Toqaevtyń arnaıy joldaǵan hatyn oqyp berdi.
«Qarataı Turysov Táýelsizdigimizdiń tuǵyryn nyǵaıtyp, egemen eldiń bılik ınstıtýttaryn qalyptastyrýǵa, Qazaqstan parlamentarızminiń negizin qalaýǵa, kásipodaq qozǵalysyn damytýǵa eleýli úles qosty. Ár jyldarda joǵary deńgeıdegi birqatar jaýapty qyzmetti abyroımen atqardy. Qarataı Turysov – qarapaıymdylyq pen qaıratkerliktiń, adamgershilik pen adaldyqtyń, otanshyldyq pen ultjandylyqtyń ozyq úlgisin kórsetken birtýar azamat», – delingen Prezıdenttiń hatynda.
Qarataı Turysov qazaq geologııasynyń damýyna ólsheýsiz úles qosty. Kóktasjal ken ornyn alǵashqy ashqandardyń biri. Búkilodaqtyq kásipodaqtardyń ortalyq keńesinde de abyroıly qyzmet atqardy.
1987 jyly tuńǵysh ret Keńes odaǵy depýtattary men AQSh kongresmenderi arasynda telekópirge qatysyp, negizgi spıkerlerdiń qatarynda bolǵanyn zamandastary maqtanyshpen aıtty.
«Qarataı Turysov táýelsizdikke deıin pisip-jetilgen tarlan tulǵa bolatyn. Keńes zamany tusynda sonaý Máskeýde Búkilodaqtyq káspodaqtardyń ortalyq keńesiniń hatshysy boldy. Qarataı aǵamyz – BUU Bas assambleıasyna Qazaqstan delegatsııasyn bastap barǵan birinshi qazaq jáne Tólegen Tájibaevtan keıin joǵary minbeden sóılegen ekinshi qazaq», – dedi memleket jáne qoǵam qaıratkeri Jaqsybek Qulekeev.
Jıynǵa qatysýshylar Qarataı Turysovtyń qaıratkerlik qasıetteri men adamı bolmysyn eske aldy. Memleket jáne qoǵam qaıratkeri Oralbaı Ábdikárimov onyń ómir joly óskeleń urpaqqa úlgi-ónege ekenin atap ótti.
«Qarataı Turysov halyqtyń súıikti perzenti boldy. Memleket basshysy Qasym-Jomart Toqaevtyń «Adal azamat» degen tujyrymdamasy bar ǵoı. Sol úlgi alatyn naǵyz adal azamattyń biri – osy bizdiń Qaırekeń. Mundaı tulǵalardyń ómiri men eńbek jolyn jastar arasynda nasıhattaýymyz kerek», – dedi O.Ábdikárimov.
Qarataı Turysovtyń qaıratkerlik bolmysy egemendik jyldary jarqyraı kórindi. Ol 90 jyldardaǵy almaǵaıyp kezeńde Mınıstrler kabınetiniń tóraǵa orynbasary bola júrip, eń qıyn da kúrdeli salalardy abyroımen basqardy. Týrızm, dene shynyqtyrý jáne sport mınıstri, Ortalyq saılaý komıssııasynyń tóraǵasy boldy.
Birinshi jáne ekinshi saılanymdaǵy Májilis depýtaty, Qarjy jáne bıýdjet komıtetiniń tóraǵasy qyzmetin atqardy.
